Uko wahagera

Abafite Visa Barinjira muri Amerika


Nyuma y’icyemezo cy’urukiko cyo guhagarika by’agateganyo iteka rya Perezida Trump rikomanyiriza abaturage b’ibihugu birindwi byiganjemo Abayisilamu, minisiteri y’umutekano w’imbere mu gihugu yatangaje kuri uyu wa gatandatu ko abantu bose bafite viza, barimo n’abo muri biriya bihugu birindwi, bemerewe kwinjira muri Leta zunze ubumwe z’Amerika.

Minisiteri y’ububanyi n’amahanga nayo yabwiye Ijwi ry’Amerika kuri uyu wa gatandatu ko iyo nkuru ari yo. Iragira, iti: “Turimo turakorana cyane na minisiteri y’umutekano w’imbere mu gihugu n’inzobere zacu mu by’amategeko. Twafashe icyemezo cyo kuba turetse gukurikiza iteka ry’umukuru w’igihugu nimero 13769. Abafite viza bashobora kuza mu gihugu.”

Ibiro by’umukuru w’igihugu “The White House” kuri uyu wa gatandatu byasohoye itangazo rivuga ko iteka rya Perezida Trump ryubahirije amategeko kandi ko ryaziye igihe nyacyo. Iri tangazo rivuga ko minisiteri y’ubutabera igomba kujuririra byihutirwa icyemezo cy’urukiko.

Perezida Trump yanditse ku mbuga ye ya twitter, ati: “America izaba mu makuba akomeye niba igihugu kitagifite ububasha bwo kuvuga ushobora n’udashobora kwinjira mu mipaka yacyo.”

XS
SM
MD
LG