Uko wahagera

Abantu ba Nyuma Barakurwa Aleppo


Komite mpuzamahanga y’umuryango utabara imbabare Croix Rouge ivuga ko yiteze ko abanyasiriya ibihumbi bagitegereje gukurwa mu mujyi wa Aleppo bazahakurwa kimwe n’abo mu imidugudu ibiri igenzurwa n’abarwanya ubutegetsi mu ntara ya Idlib. Ibikorwa byo kuhabakura biraba umunsi wose kuri uyu wa kane kugeza mu ijoro. Cyakora yaburiye ko ibihe bibi birimo gutuma ibyo bikorwa bigenda buhoro.

Croix Rouge irimo gufasha guhungisha abantu. Kugeza kuri uyu wa kane abantu bagera mu 34,000 bari bamaze kuva mu burasirazuba bw’Aleppo. Uyu mujyi wari umaze imyaka ine ufitwe n’abarwanya ubutegetsi bageragezaga gukura ku butegetsi perezida Bashar al-Assad. Iyo mibare Croix Rouge itangaza ibariyemo n’abarwanyi 4,000 bavuye muri ibyo bice by’Aleppo mu ijoro ryose.

Abandi bantu amaganga bavuye mu midugudu ya Foua na Kefraya, yo mu ntara ya Idlib kandi guverinema yashimangiye ko nabo bagomba gushyirwa mu masezerano ya nyuma yo guhungisha abantu. Byari byitezwe ko ibyo bikorwa birangira kuri uyu wa kane. Cyakora Croix Rouge ivuga ko urubura rwinshi cyane, imiyaga n’ubukonje bukabije bishobora gutuma ibyo bikorwa byongererwa igihe.

Icyumweru cyahariwe guhungisha abantu nikirangira, guverinema ya Assad, izaba igenzura Aleppo ku buryo bwuzuye. Bizaba ari ubwa mbere kuva mu mwaka w’2012. Aleppo ni umujyi wari utuwe cyane mbere y’intambara.

XS
SM
MD
LG