Umuvugizi wa Reta y’igihugu ca Zimbabwe amenyesha kw’amagara ya Perezida Robert Mugabe ameze neza, mu kwiyamiriza amakuru yatangajwe ku kibanza ngurukanabumenyi avuga ko yashikiwe n’indwara y’umutima.
Umuvugizi wa Reta ya Zimbabwe, George Charamba, yabwiye abamenyeshamakuru uno musi ku wa kane kw’amakuru yatangajwe n’ikibanza ca interinete, ZimEye atari ukuri.
Urukurukuru ku magara ya Perezida Mugabe n’ibintu biba kenshi. Azoshikana imyaka mirongo icenda n’ibiri mu kwezi kuza, akaba afata akaruhuko karekare mu mahanga mu kwezi kwa mbere.
N’irya mbere muri uyu mwaka eeta ihisemwo kwishura ku rukurukuru. Umuvugizi wa Reta ya Zimbabwe, George Charamba yidogeye urukurukuru ruguma ruvuga ko Mugabe yitavye Imana.