Imirwano imaze amezi atandatu hagati y’ingabo za leta n’inyeshyamba ziharanira ubwigenge bw’igice cy’igihugu kivuga Icyongereza yahitanye abasilikali amagana ku mpande zombi, abandi benshi nabo barakomeretse.
Imidugudu irenga 70 yarasenyutse. Abaturage bagera kuri 200 barishwe. Abandi amagana ntawuzi irengero ryabo. Abavuye mu byabo, ariko bakiri mu gihugu, ni ibihumbi. Naho abandi byibura ibihumbi 20 bahungiye muri Nigeria.
Uwari wariyise perezida wa leta ivuga Icyongereza y’Ambazonia, Julius Ayuk Tabe, ari kumwe n’abayoboke be 47, bafatiwe muri Nigeria mu kwezi kwa mbere gushize. Bahise boherezwa muri Cameroun. Ariko kuva icyo gihe ntawe urabaca iryera, nk’uko umunyamakuru w’Ijwi ry’Amerika i Yaounde, Moki Edwin Kindzeka, abitangaza.
Inyeshyamba zo muri Cameroun zivuga ko zitazashyira intwaro hasi kugera babonye ubwigenge.