Ubutegetsi bw'Abatalibani muri Afuganistani bwatangaje ko kuva bugiyeho mu kwezi kwa munani bumaze guta muri yombi abantu bagera kuri 600 bashyigikiye leta ya Kisilamu b'umutwe witwa IS-Khorasan.
Umuvugizi w'ibiro bikuru bishinzwe ubutasi mu butegetsi bw'Abatalibani, Kahlil Hamraz, yabwiye abanyamakuru i Kabul mu murwa mukuru ko muri abo bafashwe harimo abayobozi bo ku rwego rwo hejuru b'uyu mutwe mushya wa IS-Khorasan. Kahlil Hamraz kandi yatangaje ko abarwanyi bashyigikiye leta ya Kisilamu bagera kuri 40 baguye mu bikorwa byo kubahiga bigikomeje.
Yavuze ko mbere y'uko Abatalibani bafata ubutegetsi, leta yari iriho yabohoye abarwanyi ba Kisilamu bagera ku 1800 bari muri za gereza bafungiye ibikorwa byo guhungabanya umutekano.
Umutwe wa IS- Khorasan wagiye wigamba ibikorwa binyuranye byo guhungabanya umutekano hirya no hino mu gihugu nko kwiturikirizaho ibisasu n'ibindi byahitanye abasivili mu bice bitandukanye.
Intumwa idasanzwe y'Amerika muri Afuganistani, Thomas West, muri iki cyumweru yavuze ko Amerika ihangayikishijwe n'uko umutwe wa IS-Khorasan n'uwa al-Qaida bikomeje kugaragara muri iki gihugu.