Kuri uyu wa gatanu, Urukiko rw'Ikirenga rwa Leta zunze ubumwe z’Amerika rwashyigikiye icyemezo Leta y’Amerika yafashe cy’uko urubuga rwa TikTok rugurwa n’umunyamerika cyangwa rugacibwa ku butaka bw’Abamerika kuri iki cyumweru taliki 19 y’uku kwezi kwa mbere.
Leta y’Amerika yari yafashe iki cyemezo ku mpamvu z’umutekano w’igihugu. Iki cyemezo kizagira ingaruka zikomeye ku banyamerika benshi bakoresha uru rubuga rwa TikTok.
Perezida w’Amerika watowe, Donald Trump, uzarahira kuri uyu wa mbere tariki 20 y’uku kwezi kwa mbere, yari wumvikanishije ko azarengera TikTok, akaba yabuza ishyirwa mu bikorwa ry’itegeko rishya rihagarika urwo rubuga muri Amerika.
Kuri uyu wa gatanu, umuvugizi wa Perezidansi y’Amerika, Maison Blanche, Karine Jean-Pierre, yongeye gushimangira aho Perezida Biden ahagaze ko TikTok yagurwa n’umunyamerika ku mpamvu z’umutekano w’igihugu.
Itsinda rya Donald Trump ntacyo ryahise risubiza ubwo ryari risabwe kugira icyo ribivugaho. Urubuga TikTop, narwo, ntacyo rwari rwatangaza kuri icyo cyemezo cy’urukiko rw’ikirenga rw’Amerika. (Reuters)