Uburusiya bwimuye abanyagihugu baba mu bisagara bitoyi bitari bike mu ntara ya Kursk yegereye urubibe na Ukraine. Bulamatari w'iyo ntara ni we yatangaje iyo nkuru kuri uyu wa mbere.
Ico gikorwa kibaye hafi y’indwi zigera kuri 6 inyuma y’uko inteko za Ukraine zinjiye mu ntara ya Kursk yo Burusiya. Bisa n’uko Uburusiya buriko bukora ibitero vyo gusubira kwigarurira iyo ntara.
Bwatangaje ko bwasubiye kwigarurira ibisagara bito bito bitari bike kuva mu ndwi irangiya vyari vyafashwe na Ukraine.
Abategetsi b’Uburusiya bafashe ingingo yo gutegeka abantu baba mu bice vya Rylsky na Khomutovsky biri ku bilometero 15 ku rubibe Uburusiya buhana na Ukraine kuhava. Bulamatari w’intara ya Kursk, Alexei Smirnov yabitangaje ku rubuga, Telegram.
Yamara Alexei Smirnov ntiyavuze igitigiri c’abazokurwa mu bisagara vyegereye urubibe na Ukraine. Hari ibisagara bitari bike biri ku bilometero 15 uvuye kuri urwo rubibe.
Abantu barenga 150,000 baba mu ntara ya Kursk bategerejwe guhunga ingo zabo kuva Ukraine itanguye ibitero muri iyo ntara kw’italiki 8 y’ukwezi kw’umunani. Inteko za Ukraine zatangaje ko zinjiye gushika ku bilometero bitari bike ku butaka bw’Uburusiya, zifata ibisagara bitobito bitari bike. (AFP)