Umugaba mukuru w’umutwe witwara gisirikare Rapid Support Forces (RSF), Jenerali Mohamed Hamdan Dagalo, kuri iki cyumweru yari I Djibouti.
Yaganiriye na Perezida Ismail Omar Guelleh aho intambara igeze. Djibouti iri kw’isonga y’ibihugu byo mu karere k’Afrika y’iburasirazuba mu muryango wa IGAD bigerageza gushakisha umuti w’intambara no guhuza Jenerali Daglo n’umukuru w’igihugu cya Sudani, Jenerali Abdel Fattah al-Burhan ariko kugeza ubu ntibirakunda. Mu rugendo rwe rwa mbere mu mahanga kuva intambara itangiye mu kwezi kwa kane gushize, Jeneral Dagalo yari avuye mu zindi ngendo mu bihugu bituranyi birimo Uganda, Kenya, na Etiyopiya.
Mu mezi umunani imaze, iyi ntambara yo muri Sudani imaze guhitana abantu barenga 12,000. Abandi hafi miliyoni icyenda yabagize impunzi, barimo miliyoni imwe n’igice bambutse imipaka, bajya mu bihugu by’abaturanyi. (VOA News)