Muri Leta zunze ubumwe z’Amerika, urukiko rw’ikirenga rwa Leta ya Colorado, mu burengerazuba bw’igihugu, rwategetse ko Donald Trump, wahoze ari umukuru w’igihugu, adashobora gutorwa muri iyo leta, kubera ko, nk’uko rwabivuze, “yigometse ku gihugu.”
Abacamanza bemeje ko Trump yatatiye itegeko nshinga, igika cya gatatu cy’ivugurura ryaryo rya 14. Gisobanura “umuntu wese wigometse ku gihugu adashobora kujya mu nzego z’ubutegetsi.” Biturutse ku gitero cy’abayoboke be cyo ku itariki ya 6 y’ukwa mbere 2021 ku ngoro y’inteko ishinga amategeko y’igihugu, bita Capitol, mu murwa mukuru Washington.
Urubanza rwaturutse ku baturage batandatu bo muri Colorado bafashijwe n’umuryango udaharanira inyungu witwa CREW (Citizens for Responsibility and Ethics in Washington), wazobereye mu byo kujora imikorere igayitse y’abategetsi no kubakurikirana mu mategeko iyo bibaye ngombwa. Bavuga ko guverinoma ya leta ya Colorado idakwiye gushyira izina rya Trump ku mpapuro z’abakandida biyamamariza amatora y’umukuru w’igihugu azaba mu kwa 11 k’umwaka utaha.
Ku itariki ya 17 y’ukwezi gushize, umucamanza wo mu rukiko rw’ibanze rwo ku rwego rwa leta ya Colorado yaciye urubanza, avuga ko Trump afite uruhare mu bikorwa byo kwigomeka kuri guverinoma y’igihugu, ariko ko afite uburenganzira bw’uko izina rye ryandikwa ku mpapuro z’amatora.
Barajuririye urukiko rw’ikirenga rwa leta ya Colorado. None baratsinze. Abavola ba Trump batangaje ko bazajururira Urukiko rw’Ikirenga rw’igihugu, ari rwego rwa nyuma na nyuma. Ni ubwa mbere mu mateka ya Leta zunze ubumwe z’Amerika urukiko ruvuze ko umuntu wiyamamariza umwanya wa perezida wa Repubulika adafite uburenganzira bwo gutorwa. Umunyamakuru w’Ijwi ry’Amerika Rick Pantaleo yabajije Prof Matthiew Kerbel, mwalimu wa siyanse za politiki muri kaminuza Villanova muri leta ya Pennsylvaniya mu burasirazuba bwa Leta zunze ubumwe z’Amerika, icyo bisobanuye ku matora yimirije imbere.
“Ni ubwa mbere tubonye ibintu nk’ibi, aho umukandida wiyamamariza kuba perezida atakaje ubwo burenganzira. Urukiko rw’Ikirenga rw’igihugu ruramutse rugumushijeho icyemezo cy’urukiko rw’ikirenga rwa Colorado, Donald Trump ntiyashobora kuzongera kuva perezida ukundi, ubuziraherezo. Birumvikana ko byagira ingaruka cyane mu bikorwa byose bwo kwiyamamariza amatora yo mu 2024.”