Perezida Jair Bolsonaro wa Bresil yatangaje kuri uyu wa kabiri ko yanduye virusi ya Corona. Hari hashize iminsi agaragaza ibimenyetso byayo nko kugira umuriro.
Yakunze gukerensa iby'uburwayi bwaterwa na virusi ya Corona, abwira abamushyigikiye ko aramutse yanduye nta ngaruka nini byamugiraho kubera amateka ye yo kuba yarakoraga umukino wo gusiganwa n'amaguru. Yumvikanye avuga ko aramutse yanduye Covid 19 yayirwara nk'ibicurane bisanzwe.
Uku gukerensa ubukana bw'ikiza cya Covid 19 byatumye adashyira ingufu mu ngamba zo gukumira ikwirakwira ryacyo. Nko kuba yaroroheje amategeko asaba kwambara udupfukamunwa mu ruhame.
Nk’uko bitangazwa n'ibiro ntaramakuru by'Abanyamerika, AP, Bolsonaro yari amaze kwipimisha gatatu kose nta burwayi bwa Covid 19 bumugaragaraho nubwo abakozi bo mu biro bye banduye iyo virusi mu kwezi kwa gatatu nyuma y'inama yamuhuje na Perezida Donald Trump w'Amerika bari i Mar-a-Lago muri Leta ya Florida.
Bresil ni kimwe mu bihugu byazahajwe na virusi ya Corona. Abarenga miliyoni 1.6 barayanduye, 65,000 muri bo irabahitana.