Uko wahagera

Zambia: Chishimba Kambwili Yahakanye Ibyo Aregwa


Chishimba Kambwili Imbere y'Urukiko

Umuyobozi w’ishyaka ritavuga rumwe n’ubutegetsi muri Zambiya, yahakanye ibyaha mu rukiko uyu munsi kuwa gatanu, nyuma yo gutabwa muri yombi ashinjwa video yaba avugamo perezida amugereranya n’imbwa.

Chishimba Kambwili, umuyobozi w’ishyaka National Democratic Congress (NDC) yatawe muri yombi kuwa gatatu azira gukwiza video yavuzemo ko “zimwe mu mbwa z’i Chawama zitarambirwa gukora ingendo”.

Chawama ni igice gikennye cy’umurwa mukuru wa Zambiya, Lusaka, aho Lungu yatuye akanahaba umudepite mbere yo kujya ku mwanya wa perezida mu 2015.

Lungu yanakoze ingendo nyinshi mu mahanga muri uku kwezi. Yagiye mu Buhinde, mu Buyapani no mu bindi bihugu by’Afurika kubonana na bagenzi be mu bijyanye n’iterambere.

Kubera izo ngendo byatumye polise yumva ko Kambwili uwo yanengaga ari Perezida n’ubuyobozi bwe.

Kambwili yabwiye umucamanza Lameck Mwale mu rukiko i Lusaka ati: “Ikirego ndacyumva. Ndagihakana”. Yarekuwe atanze ingwate.

Urubanza rwe ruteganyijwe kuzatangira kw’italiki ya 30 y’uku kwezi gutaha kwa cyenda. Icyaha kiramutse kimuhamye yazahanishwa igifungo cy’imyaka itatu.

Abanyapolitiki batandukanye muri Zambiya, bareze Lungu guhiga abitandukanyije nawe abashinja kwagwa guverinema.

Facebook Forum

XS
SM
MD
LG