Virusi ya Corona yo mu Bwoko bwa Omicron Yageze mu Misiri

Inzego z'ubuvuzi mu Misiri zatangaje ko ku nshuro ya mbere hagaragaye virusi ya Corona yo mu bwoko bwa Omicron muri icyo gihugu.

Abantu batatu mu bagenzi 26 ni bo bagaragaweho n'iyo ndwara mu bipimo byakorewe ku kibuga mpuzamahanga cy'i Cairo mu murwa mukuru nkuko bitangazwa na ministeri y'ubuzima ya Misiri.

Itangazo ryabishyize ahagaragara ntiryavuze ibihugu abo batatu bakomokamo ariko Masrawy news, igitangazamakuru gikorera aho mu Misiri cyavuze ko baje baturuka muri Afurika y'Epfo.

Ministeri y'ubuzima ya Misiri yavuze ko babiri mu bagaragaweho n'iyo virusi nta bimenyetso bagaragazaga, mu gihe uwa gatatu yaje afite ibimenyetso byoroheje. Bose uko ari batatu bari mu kato mu ivuriro ry'i Cairo.

Inzego z'ubutegetsi zatangaje ko mu masaha 24 ashize hamaze kugaragara abantu 900 banduye, muri bo 24 bakaba bitabye Imana.