Muri Leta zunze ubumwe z'Amerika, umuyobozi mukuru w'urwego rushinzwe umutekano muri minisiteri y'ubutabera, John Demers, yeguye ku milimo ye nyuma y'ibirego ko uru rwego rwanetse bamwe mu badepite n'abanyamakuru.
John Demers ategeka urwego rushinzwe umutekano muri minisiteri y'ubutabera kuva mu kwezi kwa kabiri 2018. Yashyizweho n'uwari umukuru w'igihugu icyo gihe, Donald Trump.
Mu cyumweru gishize, ibitangazamakuru bitandukanye byashyize ahagaragara amakuru yemeza ko muri uwo mwaka 2018 uru rwego rwategetse ibigo by'ikorabuhanga binyuranye, by'umwihariko Apple, kuruha amabanga yose ya telefoni z'abadepite babiri b'Abademokarate bo muri komite y'Umutwe w'Abadepite w'inteko ishinga amategeko ishinzwe kugenzura inzego z'ubutasi n'amabanga ya telefone z'imiryango yabo.
Aba ni umukuru w'iyi komite, Adam Schiff, n'undi uyikomeyemo witwa Eric Swalwell. Icyo gihe ni bo bari ku isonga muri anketi iyi komite yakoraga ku mikoranire ya Perezida Trump n'Uburusiya. Uretse aba badepite, urwego rushinzwe umutekano muri minisiteri y'ubutabera rwategetse Apple gutanga n'amabanga yose ya telefoni z'uwari umujyanama mukuru wa peresindansi mu by'amategeko Don McGahn n'umugore we.
Ikigo ntaramakuru AP cya hano muri leta zunze ubumwe z'Amerika kivuga ko "bidasobanutse impamvu ubutegetsi bwa Trump bwashakaga amabanga y'uyu mukozi mukuru wabwo."
Urwego rushinzwe umutekano muri minisiteri y'ubutabera rwategetse Apple n'amabanga yose ya telefoni z'abanyamakuru b'ibinyamakuru bibiri bikomeye muri Leta zunze ubumwe z'Amerika: bane ba New York Times n'abandi batatu ba Washington Post. Bose bari bafite uruhare mu bucukumbuzi ku ruhare Uburusiya bwagize mu matora ya perezida wa Leta zunze ubumwe z'Amerika yo mu 2016.
Apple yabwiye kandi AP ko ikeka ko hashobora kuba hari n'ibindi bigo by'ikoranabuhanga nabyo byategetswe gutanga amabanga ya telefoni z'abantu bagera ku ijana. Muri uru rwego, Microsoft yatangaje ku mugaragaro ko nayo yabitegetswe mu 2017. John Demers azava ku mirimo ye burundu ku itariki ya 25 y'uku kwezi.
Facebook Forum