Ministri w'ububanyi n'Amahanga w'Amerika, Mike Pompeo, yamaganye Ubushinwa ku byo yise, ruswa, agahato, no kurya imitsi ya rubanda. Pompeo yari mu nama yo mu rwego rwo hejuru ihuza abategetsi bo mu bihugu by'Aziya. Amerika yizeye ko iyi nama izafatirwamo imyanzuro yo gukumira Ubushinwa bukomeje kwagura aho bufite ijambo mu karere buherereyemo.
Iyi nama ihuriwemo n'ibihugu bine: Amerika, Ubuyapani, Ubuhinde n'Australiya ije mu gihe hakomeje kuvugwa iby'uko Ubushinwa butavugishije ukuri ku byerekeye ikiza cya Virusi ya Corona kandi bukomeje kuzura umugara ku bihugu bituranye na bwo.
Avugana n'itangazamakuru ryo mu Buyapani kuri uyu wa kabiri, Pompeo, mu buryo budasanzwe, yakoresheje imvugo itaziguye avuga ko iri huriro ry'ibihugu bine rizahangana n'ibibazo biterwa n'ishyaka rya gikomuniste riri ku butegetsi mu Bushinwa. Yari yabanje kubonana n'abategetsi b'ibihugu bigize iryo huriro umwe ku wundi mbere y'uko iyo nama itangira.
Amerika imaze imyaka yingingira ibihugu by'incuti zayo muri Aziya kwishyira hamwe, kuvuga rumwe no guhangana n'Ubushinwa yemeza ko bubangamiye umutekano w'akarere. Ariko izo ngufu ziguma kubangamirwa n'imbaraga z'ubukungu bw'Ubushinwa.
Facebook Forum