Imiyigaragambyo ikaze yamagana urugomo rwa polisi ku baturage irakomeje mu mujyi wa Kenosha wo muri Leta ya Wisconsin hano muri Leta zunze ubumwe z'Amerika.
Imyigaragambyo yatangiye ku cyumweru polisi imaze kurasira umugabo w'umwirabura imbere y'abana be batatu imukomeretsa mu mugongo. Jacob Blake yahise ajyanwa mu bitaro ubu arimo koroherwa nk'uko bitangazwa na se. Gusa ibyamubayeho byafashwe kuri videwo maze bikongeza uburakari bw'abaturage batangira gutwika amazu y'ubucuruzi n'ayo servisi za reta zikoreramo, amasoko agurisha imodoka n'ubundi bucuruzi bukomeye.
Impirimbanyi ziharanira iyubahirizwa ry'uburenganzira bw'abirabura zirashaka ko abapolisi babigizemo uruhare bahagarikwa ku kazi bagahita batabwa muri yombi. Iyi myigaragambyo ibaye hashize amezi atatu nyuma y'urupfu rwa George Floyd na rwo rwateye imyigaragambyo ikaze muri Amerika no hirya no hino ku isi.
Umujyi wa Kenosha wavutsemo iyi myigaragambyo utuwe n'abirabura bacye ugereranije n'abazungu, kuko babarirwa kuri 12 ku ijana gusa. Ariko muri iyi myigaragambyo, amatsinda y'insoresore z'abazungu yaje kwifatanya n'abirabura kwamagana ibikorwa bya polisi.
Facebook Forum