Uko wahagera

Urubanza rwa Jacob Zuma Wayoboye Afurika y'Epfo Rwasubukuwe


Jacob Zuma imbere y'abanyamakuru mu kwa Karindwi uyu mwaka.

Urukiko muri Afurika y’Epfo rwasubukuye iburanisha ry’urubanza ruregwamo Jacob Zuma wahoze ayobora icyo gihugu. Arashinjwa ibyaha birimo ruswa mu gutanga amasoko yo kugura intwaro mu myaka ya za 90.

Ni urubanza rumaze igihe mu nkiko rwakomeje kugenda rutinzwa biturutse kuri Jacob Zuma n’abamwunganira. Ayo masoko bivugwa yatanzwe, afite agaciro k’amafranga agera kuri miliyari ebyiri z’amadolari.

Uru rubanza rwagombaga gusubukurwa kuri uyu wa Kabili rwongeye gutinzwa kubera impaka zatangijwe n’abunganira Zuma basaba ko umushinjacyaha mukuru muri uru rubanza Bill Downer asimburwa. Ikipe ya Zuma iramushinja kubogama.

Tariki ya mbere y’ukwezi kwa karindwi urukiko rwategetse ko Zuma afungwa kubera kwanga gukorana n’urukiko mu rundi rubanza aregwamo ruswa.

Ifungwa rye ryateje imyigaragambyo ikaze hirya no hino mu gihugu. Iyo myigaragambyo yaguyemo abantu barenga 300 inateza ubusahuzi mu bigo byinshi by’ubucuruzi. Ni yo myigaragambyo yari ikaze cyane kuva igihugu kivuye mu butegetsi bwa ba gashakabuhake.

Kuwa Gatanu ushize, urukiko rwanze ubasabe bwo gutesha agaciro icyemezo cyo gufunga Zuma amezi 15. Kubera uburwayi, Zuma w’imyaka 79 yemerewe gukurikiranwa ari mu rugo.

Uyu mukambwe utagaragaye mu rukiko kuri uyu wa Kabili, akomeje guhakana ibyaha ashinjwa akavuga ko hari impamvu za politike zibiri inyuma.

Facebook Forum

XS
SM
MD
LG