Umwuba mubi hagati y'Ubufaransa na Venezuela: Paris urarega leta ya Perezida Nicolas Maduro kwibasira ambasade yayo i Caracas.
Kuva mu ntangiriro z'uku kwezi, leta ya Maduro yakase amazi, amashanyarazi na gaz mu rugo, ku icyumbi ry'ambasaderi Romain Nadal w'Ubufaransa i Caracas, umurwa mukuru wa Venezuela. Maduro arega ambasaderi Nadal "kwivanga mu bibazo bwite bya Venezuela."
Ubufaransa "bwamaganye bwivuye inyuma ibyemezo bya guverinoma Maduro." Mu itangazo yashyize ahagaragara, umuvugizi wungirije wa minisiteri y'ububanyi n'amahanga y'Ubufaransa, Olivier Gauvin, avuga ko binyuranyije n'amasezerano mpuzamahanga y'i Vienne agenga abadipolomate na za ambasade ku isi.
Naho minisitiri w'ububanyi n'amahanga w'Ubufaransa, Jean Yves Le Drian, yahamagaje byihuyitirwa ambasaderi wa Venezuela i Paris, Héctor Ricardo, kugirango atange ibisobanuro.
Ubufaransa ni kimwe mu bihugu, birimo Leta zunze ubumwe z'Amerika, bitemera ubutegetsi bwa Perezida Maduro nyuma y'amatora yateye impagarara zikomeye muri Venezuela mu 2018, ahubwo byemeza ko utavuga rumwe na Maduro witwa Juan Guaido ari we wayatsinze.
Ndetse mu kwezi kwa mbere gushize, perezida w'Ubufaransa, Emmanuel Macron, yakiriye Guaido nk'umukuru w'igihugu mu ngoro ya Elysee akoreramo kandi abamo.
Byongeyeho, avuye mu Bufaransa asubiye iwabo i Caracas Guaido yasanganiwe n'abadipolomate b'ambasade y'Ubufaransa ku kibuga cy'indege. Aba badipolomate bavuga ko byarakaje cyane Perezida Maduro.
Facebook Forum