Uko wahagera

Umwaka 2020 Wishwemo Abanyamakuru Benshi mu Bihugu Bitari mu Ntambara


Ikirangantego cya RSF

Umuryango mpuzamahanga uharanira uburenganzira bw'abanyamakuru Reporters Sans Frontières, uremeza ko abanyamakuru benshi biciwe mu bihugu bitari mu ntambara, muri uyu mwaka wa 2020.

Nk'uko Reporters Sans Frontières, RSF mu magambo magufi, ibitangaza mu cyegeranyo cya yo, abanyamakuru 50 barishwe kugera hagati mu kwezi kwa 12, uyu mwaka, mu bihugu bitandukanye byo ku isi yose. Ariko igitangaje ni uko umubare w'abiciwe mu bihugu birimo intambara wagabanutse, ahubwo ubuhotozi bwa bo ari bwo bwiyongereye.

RSF igereranyije: mu 2016, abanyamakuru biciwe mu bihugu biri mu ntambara bari 58 ku ijana by'abishwe bose. Naho muri uyu mwaka, kugera ku italiki ya 15 y'uku kwezi, ku banyamakuru 50 bishwe kugeza ubu, 34 biciwe mu bihugu byitwa ko biri mu mahoro, ni ukuvuga 68 ku ijana.

RSF ivuga ko bishwe ku buryo bwangederewe, bwateguwe neza, rimwe na rimwe bya kinyamaswa, bazira akazi kabo, ahanini kubera ubushakashatsi bwa bo ku mitwe y'abicanyi itandukanye, ruswa, kunyereza no gukoresha nabi umutungo w'igihugu, kwangiza ku bushake ibidukikije, cyangwa bakurikirana imyigaragambyo ya rubanda nko muri Iraki, Nijeriya na Colombiya.

Ingero z'ibihugu biri ku isonga muri ubu bwicanyi bwibasiye abanyamakuru budafite aho buhuriye n'intambara ni Mexique, Ubuhinde, Pakistani, Filipine na Hondurasi.

Usibye abanyamakuru 50 bishwe kuva ku itariki ya mbere y'ukwa mbere kugera kuri 15 y'ukwa 12 mu 2020, abandi banyamakuru bagera kuri 400 barafunzwe mu bihugu bitandukanye, akenshi mu buryo bunyuranyije n'amategeko. RSF ivuga ko ari benshi cyane bidasanzwe.

Ku munyamabanga mukuru wa RSF, Christophe Deloire, igiteye impungenge ni uburenganzira bwa rubanda bwo kubona amakuru bwibasiwe cyane. Naho urugaga mpuzamahanga rw'abanyamakuru, Fédération Internationale des Journalistes, rubabajwe n'uko ubucamanza budakurikina abica abanyamakuru bazira akazi kabo.

Facebook Forum

XS
SM
MD
LG