Uko wahagera

Umugabo Wateze Bombe Yakomerekeje 13 mu Bufaransa Yafashwe


Police Igenzura Ahabereye Igitero

Polise mu Bufaransa yataye muri yombi umuntu ukekwa mu bifitanye isano na bombe yaturikirijwe mu mujyi wa Lyon mu cyumweru gishize igakomeretsa abantu 13.

Minisitiri w’ubutegetsi bw’igihugu w’Ubufaransa, Christophe Castaner yabitangaje kuri uyu wa mbere ku rubuga rwa Twitter, ariko nta bindi bisobanuro yatanze.

Ibiro by’ubushinjacyaha i Paris bishinzwe amaperereza yose kw’iterabwoba mu gihugu cy’Ubufaransa, nyuma byaje gusohora itangazo rihamya ko umugabo w’imyaka 24 yatawe muri yombi i Lyon kandi ko afunze.

Yahigwaga cyane na polise kuva mw’ijoro ryo kuwa gatanu, ubwo bombe yakorewe mu rugo yaturikaga. Imbere muri iyo bombe hari harimo imisumali. Yayiteze imbere iduka ry’ibiribwa rijyamo abantu benshi mu mujyi wa Lyon rwagati uzwi mu mateka y’igihugu.

Amafoto yafashwe na kamera y’abashinzwe umutekano, yerekanye uruhande rumwe rw’umuntu wari wiyoberanyije ari kw’igare, mbere yo gusiga igikapu imbere y’iryo duka. Aho niho igisasu cyaturikiye.

Polise yahererekanyije ayo mafoto ikoresheje kuri Twitter bituma abantu benshi bayiha amakuru yatumye uwakekwaga afatwa.

Abagore umunani, abagabo bane n’umwana w’umukobwa ufite imyaka 10 bakomerekejwe n’icyo gisasu. Cyakora ntawakomeretse ku buryo bwamuviramo urupfu nk’uko abayobozi b’ubufaransa babivuga.

Facebook Forum

XS
SM
MD
LG