Umubare w'abantu banduye Covid 19 ku isi umaze kugera kuri miliyoni 17, zibarurwamo ibihumbi 670 bahityanywe na yo. Kugeza ubu, Leta zunze ubumwe z'Amerika ni yo ibarurwamo benshi muri ibyo byiciro byombi.
Ku rugero rw'abantu miliyoni 4 n'ibihumbi 400 banduye Virusi ya Corona, Leta Zunze ubumwe z'Amerika yaraye yongeye kuza ku isonga mu kubarurwamo abantu bahitanywe na Covid 19. Kaminuza ya Johns Hopkins yatangaje ko abagera ku bihumbi 150 bamaze guhitanwa na yo muri Amerika. Muri leta zimwe na zimwe nka California, Florida na Texas, imibare y'abandura igaragara muri iki gihe irenze iyo bigeze kuva ikiza cyaduka.
Abahanga mu by'ubuvuzi muri Amerika baravuga ko za leta zafunguye ibikorwa by'ubucuruzi n'isurwa ry'ahantu nyaburanga hakiri kare. Harabura kandi ingamba n’icyerekezo bihamye ku rwego rw'igihugu kuko za leta zigomba kwiranaho mu gushyiraho amabwiriza yo kwirinda. Ibi bituma habaho amabwiriza anyuranye muri buri leta, harimo n'arebana n'abinjira mu gihugu.
Umubare w'abandura kandi ukomeje kuzamuka mu bindi bihugu nka Ositiraliya. Ubu igeze ku barenga ibihumbi 16 bibarurwamo 189 bahitanywe na yo. Ubwiyongere bw'ubwandu bwateye umuvuduko wo guhiga urukingo rw'iki kiza mu bashakashatsi. Ejo kuwa Gatatu ikigo cy'Amerika gishinzwe ibiribwa n'imiti cyavuze ko kigiye gutanga uburenganzira bwo gukoresha ku buryo bw'ingoboka rumwe mu nkingo ziri mu igeragezwa. Kugeza ubu hari inkingo ebyiri zigeze mu gihe cy'igeragezwa muri Amerika no mu Budagi.
Facebook Forum