Umubare w’abamaze guhitanwa na Covid-19 kw’isi, warenze 50 000 kuri uyu wa gatanu. Mu gihe Leta zunze ubumwe z’Amerika, Esipanye n’Ubwongereza ari byo bifite umubare munini kugeza ubu, ubukungu kw’isi na bwo burahazahariye.
Impuguke ziburira ko abantu barenga miliyoni byemejwe ko banduye virusi ya Corona kw’isi, bashobora kuba ari bake cyane ku mubare w'abanduye bose, mu gihe ibipimo by’iyi virusi bitari byaboneka ku buryo busesuye.
Amerika ifite hafi kimwe cya kane cy’abemejweho iyo ndwara, kandi Ubulayi buracyari kure yo kuba bwakwiruhutsa imbere y’uyu mutwaro.
Uyu munsi kuwa gatanu, Esipanye yatangaje abantu barenga 900 bahitanywe n’iki cyorezo mu masaha 24.
Mu gihe Ubutaliyani buza imbere mu bihugu byapfuyemo abantu benshi kw’isi, Ubufaransa, Ububiligi n’Ubwongereza na byo ntibyorohewe.
Guverinema y’Ubwongereza yihutiye kubaka ibitaro byimukanwa, nyuma y’uko abantu 569 bitabye Imana mu munsi umwe rukumbi.
Ubukungu kw’isi na bwo bwagezweho n’ingaruka za virusi ya Corona, kubera ko abantu barenga kimwe cya kabiri cy’abatuye isi, bategetswe kuguma mu ngo zabo.
Mu gihe kw’isi hose impuguke mu by’ubuzima bw’abaturage zikomeje guhangana n’iki cyorezo, mu Budage baravuga ko umubare w’abandura wagenje amaguru make kandi ko babikesha ingamba zo kudasohoka.
Ariko ku mugabane w’Aziya, igihugu cya Singapore cyemeje ko kigiye gufunga amashuri no gufunga ibiro, kugira ngo hatagira abandi bantu bandura.
Facebook Forum