Umunyapolitiki utavuga rumwe na leta ya Uganda, Robert Kyagulanyi, Bobi Wine, we n'umuryango we bafungishijwe ijisho iwe kuva ku munsi w'itora ry'umukuru w'igihugu, ku italiki ya 14 y'uku kwezi. Nta muntu n'umwe, yemwe n'abavandimwe babo, wari wemerewe kujya kubasura.
Bobi Wine yarareze. Ikirego cye cyatsinze uyu munsi, urukiko ruvuga ko inzego z'umutekano zigose urugo rwe mu buryo bunyuranyije n'amategeko kandi ko bihonyora uburenganzira bwe n'umuryango we bwo kwidegembya. Rwavuze ko zihita zihava, nabo bagahita basubizwa uburenganzira bwabo.
Abashinjacyaha bo baburanye bemeza ko inzego z'umutekano zagose kwa Bobi Wine kugira ngo zimurindire umutekano gusa, kandi ko umugore we, Barbara Itungo, we atari afunze.
Abavoka ba Bobi Wine bishimiye icyemezo cy'ubucamanza, batangaza ko bizeye ko leta icyubahiriza. Ku rundi ruhande, umuvugizi wa UPDF, igisilikali cya Uganda, Général de Brigade Flavia Byekwaso, yavuze ko inzego z'umutekano zihita zishyira mu bikorwa koko iteka ry'urukiko.
Bobi Wine avuga ko amatora yibwe ahubwo ko ari we perezida watowe. Naho Perezida Museveni yemeza ko amatora aherutse ari yo ya mbere yanyuze mu mucyo mu mateka ya Uganda. Leta zunze ubumwe z'Amerika yo ivuga ko ihangayikishijwe n'ibirego by'uko amatora yaba koko yarabayemo amahinyu no guta abantu muri yombi ku mpamvu za politiki.
Facebook Forum