Ishami ry'Umuryango w'Abibumbye ryita ku mpunzi HCR ryatangaje umugambi wo gutanga urukingo rwa Covid 19 ku mpunzi zose ziri mu gihugu cya Uganda. Ibi biri muri gahunda y'igihugu yo gukingira abaturage ndetse n’abatuye muri Uganda bose, harimo n’impunzi nkuko byategetswe na Perezida Yoweri Museveni wa Uganda.
Nkuko HCR ibitangaza, impunzi zirenga milliyoni ni zo ziteganywa guhabwa urukingo rwa Covid 19 muri iyi gahunda. Ni igikorwa kigamije gukumira icyo cyorezo mu gihugu, cyane cyane mu nkambi z’impunzi zituwe mo n’abantu benshi.
Ministiri ushinzwe impunzi n’ibiza muri Uganda, Hilary Onek, yavuze ko leta ifite gahunda yo kugeza ubuvuzi kuri buri muntu wese utuye mu gihugu, akaba ari muri urwo rwego batangiye gukingira impunzi bahereye ku barengeje imyaka 50.
Uganda icumbikiye impunzi zisaga 1,400,000 nkuko bitangazwa na HCR. Ivuga ko muri iyi gahunda yo gukingira icyorezo cya COVID-19 nta mpunzi ikwiye gusigara idakingiwe nkuko bitangazwa na Joel Boutroue uyoboye HCR muri Uganda.
Amabwiriza yo gukingira buri muntu utuye muri Uganda yatanzwe na perezida Museveni w'iki gihugu mu kwezi kwa gatatu. Abashinzwe iby'ubuzima bakabona ko impunzi ziri mu matsinda agomba guhabwa urukingo mu buryo bw'ibanze.
Kuva aho icyorezo cya Covid 19 cyagereye mu gihugu mu mwaka ushize, hafi impunzi 400 ni zo zimaze kwandura icyorezo cya Covid 19. Muri abo abagera kuri 7 ntibahonotse icyo cyago. Abakozi 289 b’imiryango itandukanye yita k’umpunzi nabo baranduye umwe muri bo yitaba imana nkuko HCR ibitangaza.
Bamwe mu bahungiye mu gihugu cya Uganda babwiye Ijwi ry'Amerika ko bishimiye iyi gahunda, bavuga ko izabafasha gukumira iki kiza cyari gihangayikishije abatari bake mu mpunzi kuva aho gitangiriye guhitana bamwe muri bo.
Uganda yatangije umugambi wo gukingira abaturage bayo icyorezo cya Covid-19 mu kwezi kwa gatatu, ihereye ku bakozi b'inzego z'ubuvuzi n'abantu barengeje imyaka 50. Gusa bigaragara ko iki gikorwa kititabiriwe cyane. Imibare itangwa na ministeri y'ubuzima muri Uganda yerekana ko abagera ku 300,000 gusa ari bob amaze guhabwa uru rukingo.
Facebook Forum