Iryo vangura ryagaragaye ku mbuga nkoranyambaga nyuma y'uko ikipe y'Ubwongereza itsinzwe n'iy'Ubutaliyani ibitego 2-3 muri shampiyona y'igikombe cy'Ubulayi ejo ku cyumweru.
Ubutaliyani n'Ubwongereza bakomeje kunganya igitego kimwe kuri kimwe mu gihe kigenwe cy'umukino no mu minota y'inyongera, biba ngombwa ko binjira muri za penaliti.
Abakinnyi b'aburabura Marcus Rashford, Jadon Sancho na Bukayo Saka bahushije izo penaliti bituma Ubutaliyani butsinda Ubwongereza.
N'ubwo ku mbuga nkoranyambaga ikipe y'Ubwongereza yashimwe muri rusange, nyuma gato y'umukino hatangiye kugaragara amagambo y'ivangura rishingiye ku ibara ry'uruhu atoteza abo bakinnyi batatu.
Yandika ku rubuga rwe rwa Twitter, Ministri w'Intebe w'Ubwongereza Boris Johnson yavuze ko ikipe yose ikwiriye gushimwa nk'intwali aho gukorerwa itotezwa rijyanye n'ivangura rishingiye ku ibara ry'uruhu. Yavuze ko ababikoze bakwiriye kugira ipfunwe ry'ibyo bakoze.
Umuyobozi w'umujyi wa London, Sadiq Kahn, na we yunze mu rye, yandika kuri Twitter ko nta mwanya ivangura rishingiye ku ibara ry'uruhu rifite haba mu mupira w'amaguru cyangwa ahandi hose. Yavuze ko abarikoze bakwiriye kubibazwa.
Ishyirahamwe ry'umupira w'amaguru mu Bwongereza ryasohoye itangazo ryamagana uburyo bwose bw'ivangura rishingiye ku ibara ry'uruhu. Iryo shyirahamwe ryashyigikiye abakinnyi baryo.
Polisi y'i Londres na yo yanditse kuri Twitter ko yamenye iby'ayo magambo yavuzwe, itangaza ko bitemewe kandi ko izabikoraho iperereza
Abakinnyi b'Ubwongereza na bo bagaragaje ko barwanya ivangura rishingiye ku ibara ry'uruhu muri iyi shampiyona babanza gupfukamisha ivi rimwe mbere y'uko batangira imikino yabo yose harimo n'uwo ku cyumweru. Si ko abafana bose bashyigikiye iki gikorwa kuko hari bamwe babamwazaga.
Nubwo Ministri w'Intebe Boris Johnson yasabye abafana kutamwaza abakinnyi, abamunenga bavuga ko atagaragaje igitsure gihagije. Bavuga ko ahubwo byatije umurindi abakora ivangura rishingiye ku ibara ry'uruhu.
Mu kiganiro yagiranye na televiziyo y'abongereza Sky News, Gary Neville, wahoze akinira Ubwongereza yavuze ko ibyabaye byatewe na Ministri w'intebe Johnson yagize ati: "Ministri w'Intebe yavuze ko ntacyo bitwaye kuba abaturage b'igihugu cye bamwaza abakinnyi barimo gushyigikira uburinganire no kurwanya ivangura rishyingiye ku ibara ry'uruhu. Bihera mu buyobozi bukuru. Kuri jye sinatangaye na gato mbutse ngasanga mu makuru banditse ariya magambo".
Muri iyi nkuru harimo amakuru dukesha biro ntaramakuru by'Abanyamerika (AP) Ibiro ntaramakuru by'Abongereza (Reuters) n'Ibiro ntaramakuru by'Abafaransa (AFP)
Facebook Forum