Abaturage barenga miliyoni ijana biriwe mu matora y’inteko ishinga amategeko muri Pakistani. Ubwicanyi bukomeye bwaranze aya matora. Itora rimaze akanya gato ritangiye mu gitondo, umwiyahuzi yiturikije n’ibisasu ku biro by’itora mu mujyi wa Quetta, umurwa mukuru w’intara ya Baluchistan, mu majyepfo y’igihugu.
Yahitanye abantu 31, akomeretsa abandi 40. Barimo abaturage bari bagiye gutora, abapolisi, n’abanyapoliti, nk’uko polici ibisobanura. Umutwe wa Leta ya Kisilamu watangaje ko ari wo wagabye icyo gitero.
Ubundi bwicanyi butandukanye bwahitanye abantu batandatu. Hashize ibyumweru bibili muri iyi ntara ya Baluchistan, ihana imbibe na Irani, umutwe wa Leta ya Kisilamu waturikije ibisasu mu ikoraniro ryo kwiyamamaza, uhitana abantu 151.
Abaturage bagomba gutora abadepite 272. Izindi ntebe 70 zigenewe abategarugoli na ba nyamuke. Ni ubwa gatatu mu mateka ya Pakistani ubutegetsi bugiye gusimburana binyuze mu matora. Pakistani yaranzwe cyane cyane na za “coup d’Etat.”
Amashyaka abili ni yo ahanganye cyane kurusha andi: ishyaka PML-N ry’uwahoze ari minisitiri w’intebe Nawaz Sharif, wakatiwe imyaka 10 yo gufungwa kubera ibyaha bya ruswa. Hashize ibyumweru bibili atawe muri yombi. Ishyaka rya kabili rikomeye PTI rya Imran Khan, wigeze kuba icyamamare muri cricket, umukino wa mbere mu mikino yose yo muri Pakistani.
Facebook Forum