Uko wahagera

Ubutariyano Bwipfuza Kuburanisha Abofisiye ba Misiri Bane


Bamwe mu bagize ishirahamwe riharanira agatea ka zina muntu, Amnesty International mu myirekano isaba ukuri ku rupfu rwa Giulio Regeni

Abashinjacyaha b’Ubutaliyani barasaba umucamanza kuburanisha abofisiye bane ba Misiri ku rupfu rwa Giulio Regeni, wiciwe i Kayiro mu mwaka wa 2016. Abashinjacyaha b’Ubutaliyani, uyu munsi kuwa kabiri basabye ko abo bofisiye bane bo muri serivisi zishinzwe umutekano za Misiri, bagezwa imbere y’urukiko, ku ruhare rwabo mw’irigiswa n’urupfu rwa Giulio Regeni. Uyu yari umunyeshuri i Kayiro mu mwaka wa 2016.

Regeni yari yararangije kaminuza ya Cambridge mu Bwongereza. Yaburiwe irengero mu murwa mukuru wa Misiri mu kwezi kwa mbere 2016. Umurambo we wabonetse icyumweru kimwe nyuma yaho kandi ibizamini byakozwe ku murambo we byerekanye ko yakorewe iyica rubozo mbere yo kwicwa burundu. Polisi ya Misiri n’abayobozi bahakanye kuba hari uruhare na ruto bagize mu rupfu rwa Regeni.

Abashinjacyaha b’Ubutaliyani na Misiri bakoranye amaperereza kuri iki kibazo. Cyakora impande zombi nyuma zaje kutumvikana, kandi zigera ku myanzuro ihabanye cyane. Abashinjacyaha bo mu Butaliyani bareze abofisiye bane “ishimuta ririmo iyicarubozo” ryakorewe Regeni. Bakongeraho ko umwe muri bo, Majoro Magdi Sharif wo mu biro bikuru bishinzwe iperereza, agomba gushinjwa “ubugambanyi muri ubwo bwicanyi”.

Abategetsi ba Misiri ntibabashije kuboneka ngo bagire icyo bavuga ku birego by’ubushinjacyaha. Abashinjacyaha ba Misiri bavuze ko mu mwaka ushize “batari bashyigikiye” ibyo Ubutaliyani bwagezeho kandi basabye ko ibirego kuri abo bofisiye bane, byakurwa mw’isosiyete y’urubanza.

Ubutabera bw’Ubutaliyani, buvuga ko bagenzi babo ba Misiri batatanze aderesi z’abakekwa uko ari bane kandi ko nta n’umwe muri bo witezweho kuba yajya mu rukiko.

Ababyeyi ba Regeni bari mu cyumba cy’urukiko uyu munsi kuwa kabiri, mu rubanza rwabereye mu muhezo. Ntibyamenyekanye niba umucamanza ari bufate umwanzuro mbere y’uko umunsi urangira. Urubanza nyirizina ruramutse rubaye bisa n’aho rutatangira mbere y’ikiruhuko cy’impeshyi. Rwagombaga kuba mu kwezi gushize, ruza kwimurirwa inyuma bitewe n’uko umwe mu bacamanza yari arwaye COVID-19.

Regeni yari i Kayiro akora ubushakashatsi ku masendika yigenga ya Misiri, yagombaga kwandikaho igitabo asoza icyikiro cy’ikirenga cya kaminuza. Yari ashishikajwe kandi no kumenya ibijyanye n’ubukungu bwa Misiri bumaze igihe mu maboko y’abagize leta n’igisilikare. Ibyo bintu byombi ni ibintu bidapfa kwisukirwa mu gihugu cya Misiri.

Facebook Forum

XS
SM
MD
LG