Uko wahagera

Ubushinwa Bwirukanye Abamenyeshamakuru ba Wall Street


Perezida w'Ubushinwa Xi Jinping

Leta y’Ubushinwa yirukanye abanyamakuru batatu b’ikinyamakuru “Wall Street Journal” cyo muri Leta zunze ubumwe z’Amerika.

Iki kinyamakuru kivuga ko aba banyamakuru ari umuyobozi wungirije w’ibiro bya Wall Street Journal, WSJ mu magambo ahinnye, by’i Beijing, Josh Chin, n’umunyamakuru Chao Deng, bombi b’Abanyamerika, n’umunyamakuru Philip Wen, w’Umunya-Australia.

Bose uko ari batatu bahawe iminsi itanu kugirango babe bavuye ku butaka bw’Ubushinwa. Barazira umutwe w’inkuru ya WSJ yo ku italiki ya 3 y’uku kwezi, Leta y’Ubushinwa ivuga ko “yuzuyemo urwango mvanguramoko.”

Uwo mutwe uvuga ngo “Ubushinwa ni umugabo urwaye w’Aziya.” Iyi nteruro mu mateka yakoreshwaga mu rwego rwo kunnyega Abashinwa bafite indwara yatuma babanena, bashyirwa mu kato, mbese nk’ababembe.

Iyi nkuru, imeze nk’ijambo ry’ibanze, yanditswe n’umwalimu wa kaminuza witwa Walter Russell Mead, unenga uko Ubushinwa bwitwaye mu bikorwa byo kurwanya virus ya Corona.

Umuvugizi wa minisiteri y’ububanyi n’amahanga y’Ubushinwa, Geng Shuang, yabwiye abanyamakuru ko WSJ yanze gusaba imbabazi.

Ishyirahamwe ry’abanyamakuru b’abanyamahanga bakorera mu Bushinwa ryamaganiye kure icyemezo cyo kwirukana bagenzi babo ba WSJ. Rivuga ko leta y’Ubushinwa ishaka gutera ubwoba ibinyamakuru by’ibinyamahanga.

Facebook Forum

XS
SM
MD
LG