Perezida w'Ubushinwa Xi Jinping kuri uyu wa gatandatu yatangaje ko ikirwa cya Tayiwani kizasubirana n'Ubushinwa mu mahoro. Ntiyigeze avuga mu buryo butaziguye ko hazakoreshwa ingufu ariko yavugiye i Beijing ko Ubushinwa bufite amateka yubashwe mu guhangana n'abashaka kubwitandukanyaho.
Hashize icyumweru hari impaka z'urudaca ku rwego mpuzamahanga zirebana n'iki kirwa Ubushinwa bwita igihugu kimwe na bwo ariko cyo kikavuga ko ari igihugu cyigenga.
Ubushinwa bwotsa Tayiwani igitutu mu buryo bwa politike n'ubwa gisirikare ngo ibubone nk'igihugu kimwe ariko Tayiwani ntibikozwa. Yiyemeje guharanira ubusugire bwayo n'ahazaza hayo nk'igihugu.
Perezida Xi Jinping yavuze ko Tayiwani yongeye kuba igihugu kimwe n'Ubushinwa ku neza byaba ari mu nyungu z'abaturage bayo ariko yongeraho ko "Ubushinwa buzarinda ubusugire n'ubumwe bwabwo".
Yagize ati: "Nta n'umwe ukwiriye kwibeshya ku muhate, ubushake, n'ubushobozi bw'Abashinwa mu kurengera ubusugire bw'igihugu n'ubutavogerwa bwacyo. Amateka yo kunga no kubumbatira igihugu cyatubyaye agomba kubahirizwa kandi azubahirizwa nta gisibya".
Kuva taliki ya mbere uku kwezi indege zigera ku 150 zimaze kwinjira mu kirere cya Tayiwani iminsi ine zikurikiranya.
Tayiwani ivuga ko ari igihugu cyigenga cyitwa Repubulika y'Ubushinwa cyashinzwe mu 1912 n'abategetsi bahahungiye bamaze gutsindwa mu ntambara barwanaga n'abakomuniste muri 1912 ari bo bashyizeho Repubulika ya Rubanda y'Ubushinwa.
Facebook Forum