Uburusiya bwatangaje ko bwabaye igihugu cya mbere mu gushyira hanze urukingo rwa Virusi ya Corona, buvuga ko ruzatangira gutangwa mu kwezi gutaha.
Perezida Vladimir Putin w'Uburusiya yavuze ko igihugu cye cyabaye icya mbere ku isi kwemeza ku mugaragaro urukingo rwa virusi ya Corona. Yabitangarije mu nama yagiranye n'abagize Leta ye yahitishwaga kuri Televiziyo y'igihugu kuri uyu wa kabiri.
Perezida Putin yemeje ko urwo rukingo rukora neza kandi ko rwageragejwe mu buryo bwose bwa ngombwa rukemezwa ko ari nta makemwa. Yavuze ko umukobwa we ari mu barugeragerejweho akagira umuriro mucye mu mubiri we ariko umunsi ukurikiyeho bigashira. Perezida Putin yavuze ko Uburusiya bugiye gutangira gukora uru rukingo mu bwinshi.
Ubutegetsi bwo mu Burusiya bwavuze ko urwo rukingo rwavumbuwe n'ikigo Gamaleya cy'i Moscow ruzabanza gutangwa ku bakozi bo mu buvuzi, abalimu n'abandi bakora akazi gatuma bashobora kwandura vuba. Ministri w'intebe wungirije w'Uburusiya Tatyana Golikova yavuze ko gukingira abaganga bishobora gutangira mu kwezi gutaha.
Facebook Forum