Uko wahagera

Ubufaransa: Navalny Yopfira mu Gasho Uburusiya Bwokwibonera


Umushikiranganji ajejwe imigenderanire y'Ubufaransa n'ayandi makungu Jean Yves Le Drian

Umushikiranganji ajejwe imigenderanire y’Ubufaransa n’ayandi makungu, Jean-Yves Le Drian, kuri uno wa kane yagabishije Uburusiya hamwe na Prezida wabwo Vladimir Putin.

Mu kiganiro Le Drian yahaye tereviziyo y’abafaransa France 2, yagize ati: “ Haramutse hagize ikiba, Alexei Navalny atavuga rumwe n'ubutegetsi bw'Uburusiya agasandabira mu mvuto, bizoja ku gatwe ka Putin n’abategetsi bandi b’Uburusiya.”

Imvugo ni nk’iyo ku ruhande rw’Amerika: Umuhanuzi mu vy’umutekano mu biro vy’umukuru w’igihugu, Jake Sullivan, yabwiye tereviziyo CNN ko mu gihe Navalny yoramuka apfiriye mu gasho, Uburusiya bwogira ingorane.

Abahinga ba ONU mu vy’agateka ka zina muntu nabo ejo ku wa gatatu batangaje ko ubuzima bw’uwo munyepolitike buri mu kaga, bongera bagiriza Reta ko yamwankiye kubonana n’abaganga biwe. Abo bahinga basavye bashimitse ubutegetsi bwa Putin kumureka akaja kwivuriza ahandi atari muri ico gihugu. Ntaco Uburusiya buravuga ku vyagiriji vy'abo bahinga bavuga ko Reta yamwankiye kuja kwivuriza mu kindi gihugu.

Alexei Navalny amaze indwi zitatu ari muri yegereyegere yo kwiyamiriza ipfungwa ryiwe mu kwisonzesha, yatawe mu mvuto mu kwezi kwa mbere akimara kuva mu Budagi kwivuza ishano yemeza ko yahawe n’ubutegetsi. Ni ivyagiriji Reta yamirira kure.

  • 16x9 Image

    Diane Nininahazwe

    Diane Nininahazwe akorera igisata c'Ikirundi n'Ikinyarwanda kuva mu 2015. Imbere yo gutangura gukorera ku cicaro gikuru i Washington-DC nk'umumenyeshamakuru n'uwushinzwe imbuga ngurukanabumenyi z'ico gisata (Digital Lead), yakoreye Ijwi ry'Amerika mu Burundi, i Buraya ku murwa mukuru w'Ubudagi i Berlin, no mu gisagara ca Los Angeles muri Reta ya California iri mu mu burengero bushira ubumanuko bw'Amerika. Umwuga wo kumenyesha amakuru yawutanguye mu 2004 aho yakoreye ibimenyeshamakuru bitandukanye birimwo iradiyo yigenga Bonesha Fm n'ikimenyeshamakuru c'Abafaransa, Le Point Afrique. Imbere yo gukorera Ijwi ry'Amerika, Nininahazwe yakora ibiganiro vy'amashirahamwe yigenga arimwo iryo mu Buholande, La Benevolencija, iry'Abanyamerika, PSI, iry'Abadagi, EIREN, na CED-Caritas Burundi. Kuva mu 2011, ari mu murwi w'abamenyeshamakuru igisata ca ONU kiraba ivy'ubutunzi, UNECA, gikoresha nk'abigenga mu gukurikirana amanama mpuzamakungu ku vy'ihindagurika ry'ibihe n'iterambere rirama. Afise impamyabushobozi ya kaminuza mu gisata co kumenyesha amakuru mu bijanye n'iterambere (Communication Pour le Développement), n'urupapuro mu vy'umwuga wo kumenyesha amakuru muri rusangi (Multimedia Journalism). Amaze gutahukana ubushimwe butandukanye mu vy'ukumenyesha amakuru burimwo bubiri mpuzamakungu.

Facebook Forum

XS
SM
MD
LG