Mu itangazo yashyize ahagaragara, minisitiri w'ububanyi n'amahanga wa Leta zunze ubumwe z'Amerika, Anthony Blinken, avuga ko "umubano w'ibihugu byombi ugiye gutera indi ntambwe ubwo iki kibazo cy'ingorabahizi kivuye mu nzira."
Blinken asobanura ko aya madolari agenewe imiryango y'abazize ibikorwa by'iterabwoba bya al-Qaeda byo mu 1998 kuri ambasade z'Amerika i Nairobi muri Kenya n'i Dar es Salaam muri Tanzaniya, ku bwato bw'intambara bw'Amerika USS Cole mu cyambu cya Aden muri Yemen mu 2000, n'iyicwa ry'umudipolomate w'Umunyamerika witwa John Granville mu 2008 i Khartoum muri Sudani.
Ibitero bya al-Qaeda kuri ambasade z'Amerika byombi byahitanye abantu 224, barimo Abanyamerika 12, bikomeretsa n'abandi barenga ibihumbi bine. Naho icyo kuri USS Cole kishe abasirikari b'Abanyamerika 17, gikomeretsa n'abandi 39. Inkiko zo muri Leta zunze ubumwe z'Amerika zemeje ko Sudani nayo yagize uruhare muri ibi bitero bya al-Qaeda.
Ibihugu byombi byageze ku masezerano yo kwishyura impozamalira mu kwezi kwa cumi gushize. Aya masezerano yakurikiwe mu kwezi kwa 12 kwakurikiyeho n'icyemezo cya Leta zunze ubumwe z'Amerika cyo gukura Sudani ku rutonde rw'ibihugu bishyigikira iterabwoba ku isi yariho kuva mu 1993.
Facebook Forum