Uko wahagera

Siriya mu Matora Ashobora Kutitabirwa n'Abatavuga Rumwe na Reta


Perezida wa Siriya Bashar al-Assad

Siriya izotunganya amatora y’umukuru w’igihugu igenekerezo rya 26 z’ukwezi kuza kwa gatanu. Vyatangajwe n’umuvugizi w’inama nshingamateka kuri uno wa Mungu, yavuze ko abakandida bashaka guhiganira intebe ya Prezida bashobora gutangura gutanga kandidatire zabo kuri uno wa mbere.

Ibwirizwa shingiro rya Siriya riheruka guhindurwa mu 2012 rivuga ko ata mukuru w’igihugu yemerewe kurenza manda zibiri. Rihindurwa ico gihe ariko ryatomoye ko uwuzotahukana intsinzi mu 2014 azoba afise uburenganzira bwo kwitoreza manda yindi y’imyaka indwi mu 2021: Prezida Bashar Al-Assad rero arafise uburenganzira bwo kwitoreza manda ya gatatu.

Iyindi ngingo iri mw’ibwirizwa nshingiro rya Siriya iha amahirwe menshi Bashar Al-Assad, ivuga ko umukandida abwirizwa kuba afise n’imiburiburi abashingamateka 35 mu nama nshingamateka kugira yemererwe kwitoza: Abashingamateka bari ku ruhande rwa Assad ni bo benshi.

Iryo bwirizwa shingiro riraza mu yindi ngingo yaryo rikavuga ko umukandida yemererwa kwitoza mu kibanza ca Perezida aba yabaye mu gihugu n’imiburiburi imyaka cumi ikurikirana, vyumvikana ko abenshi mu banyepolitike bari mu buhungiro ata burenganzira bwo kwitoza muri ano matora bazoba bafise.

Naho Bashar Al-Assad yagiye ku butegetsi mu 2000 asubiriye se Hafez Al-Assad, ahabwa amahirwe menshi yo kuguma ku butegetsi, ntaravuga niba afise umugambi wo gusubira kwitoreza manda ya gatatu y’imyaka indwi.

Amatora ya Siriya yo mu kwezi kuza kwa gatanu agiye kuba mu ntambara itaracureha n’ubutunzi bugeze aho umwansi ashaka muri ico gihugu. Ni amatora kandi azosanga abanyesiriya batari bake mu makambi y’impunzi yaba ayo hagati mu gihugu canke mu bindi bihugu. Intambara imaze igihe muri Siriya imaze guhitana n’imiburiburi abantu bagera ku bihumbi 388.

  • 16x9 Image

    Diane Nininahazwe

    Diane Nininahazwe akorera igisata c'Ikirundi n'Ikinyarwanda kuva mu 2015. Imbere yo gutangura gukorera ku cicaro gikuru i Washington-DC nk'umumenyeshamakuru n'uwushinzwe imbuga ngurukanabumenyi z'ico gisata (Digital Lead), yakoreye Ijwi ry'Amerika mu Burundi, i Buraya ku murwa mukuru w'Ubudagi i Berlin, no mu gisagara ca Los Angeles muri Reta ya California iri mu mu burengero bushira ubumanuko bw'Amerika. Umwuga wo kumenyesha amakuru yawutanguye mu 2004 aho yakoreye ibimenyeshamakuru bitandukanye birimwo iradiyo yigenga Bonesha Fm n'ikimenyeshamakuru c'Abafaransa, Le Point Afrique. Imbere yo gukorera Ijwi ry'Amerika, Nininahazwe yakora ibiganiro vy'amashirahamwe yigenga arimwo iryo mu Buholande, La Benevolencija, iry'Abanyamerika, PSI, iry'Abadagi, EIREN, na CED-Caritas Burundi. Kuva mu 2011, ari mu murwi w'abamenyeshamakuru igisata ca ONU kiraba ivy'ubutunzi, UNECA, gikoresha nk'abigenga mu gukurikirana amanama mpuzamakungu ku vy'ihindagurika ry'ibihe n'iterambere rirama. Afise impamyabushobozi ya kaminuza mu gisata co kumenyesha amakuru mu bijanye n'iterambere (Communication Pour le Développement), n'urupapuro mu vy'umwuga wo kumenyesha amakuru muri rusangi (Multimedia Journalism). Amaze gutahukana ubushimwe butandukanye mu vy'ukumenyesha amakuru burimwo bubiri mpuzamakungu.

Facebook Forum

XS
SM
MD
LG