Muri Senegal, umuntu umwe yaguye mu myivumbagatanyo y'abashyigikiye umunyapolitiki Ousmane Sonko, utavuga rumwe na leta.
Depite Sonko yatawe muri yombi kuwa gatatu. Aregwa guhungabanya umudendezo wa rubanda. Kuva amaze gufatwa, abayoboke be bari mu myigaragambyo. Ibinyamakuru bitandukanye bivuga ko basahura amangazini ya rubanda, bakanatwika ibiziga by'imodoka bishaje.
Bahanganye n'abapolisi uyu munsi, babatera amabuye, nabo babarasamo ibyuka biryana mu maso. Umuntu umwe, umusore w'umunyeshuri w'imyaka 20, yabiguyemo, ariko ntibirasobanuka uburyo yapfuyemo. Ni we muntu wa mbere uzwi uguye muri iyi myivumbagatanyo.
Polisi ivuga ko abayo bane bakomeretse, ariko ntivuga umubare w'abasiviri bakomeretse.
Leta yafunze mu gihe cy'iminsi itatu televiziyo ebyiri zigenga. Irazirega ko zahitishije inshuro nyinshi amashusho y'imyivumbagatanyo, bityo nazo ko zenyegeza urugomo.
Ousmane Sonko, w'imyaka 46 y'amavuko, yabaye kandida mu matora y'umukuru w'igihugu mu 2019, aza ku mwanya wa gatatu. Yavuze kandi ko azajya no mu yo mu mwaka w'2024.
Facebook Forum