Uko wahagera

Rwanda: Leta Yahagurukiye Abandura Covid 19 Ntibishyire mu Kato


Gatabazi Jean Marie Vianney, Ministri w'Ubutegetsi bw'Igihugu mu Rwanda

Leta y’u Rwanda iratangaza ko igiye gukurikirana by’umwihariko abarwayi ba Covid-19 barwariye mu rugo mu rwego rwo guca intege abasanganwa iyo ndwara bakanga kwishyira mu kato.

Ministiri w’ubutegetsi bw’igihugu, Gatabazi Jean Marie Vianney yabivugiye mu kiganiro cyihariye yahaye Ijwi ry’Amerika kuri uyu wa kabiri. Yavuze ko hashize iminsi hagaragara abarwayi bapimwa bagasanganwa Covid-19 ariko bakanga kwishyira mu kato. Abanduye Covid 19 ubusanzwe bagumishwa mu kato kugeza igihe byemejwe ko bakize rwose adashobora kwanduza abandi.

Bamwe mu bakozi b'inzego z'ubuvuzi bashinzwe gukurikirana aba barwayi babasanze mu ngo zabo, na bo babwiye radiyo Ijwi ry'Amerika ko bamwe mu bantu banduye Covid 19 babihisha kubera gutinya ko bategekwa kuguma mu kato. Madame Ingabire Josine, umwe mu babakurikirana avuga ko iki ari ikibazo gikomeye kuko bahita banduza abandi benshi.

Kugeza ubu usibye gusaba abanduye kwishyira mu kato mu ngo zabo, banambikwa isaha yerekana ko umuntu yanduye Covid-19. Ariko bamwe mu bayambitswe bavuga ko babangamiwe n'ubu buryo bwo kubagaragaza.

Mu gihe hakomeje kugaragara ikibazo cy'ibiribwa muri imwe mu miryango itishoboye kubera ingamba zo kwirinda Covid 19, ministiri w’ubutegetsi bw'igihugu avuga ko kugeza ubu abaturage batifashije bari muri gahunda ya 'Guma mu Rugo' bafashishwa ibiryo, gusa yongeyeho ko umujyi wa Kigali washyizeho umwihariko ku banduye Covid-19. Asaba abaturage bose bakiri muri 'Guma mu Rugo' kubahiriza amabwiriza, ariko by’umwihariko abarwayi kurushaho kurinda abandi kwandura.

Umujyi wa Kigali wongereye amafunguro arimo isukari, amata, porici ihabwa abana ndetse n’amavuta, ku byari bisanzwe bihabwa abaturage bose batishoboye.

Kugeza ubu ministeri y’ubuzima itangaza ko 95 ku ijana y'abarwayi ba Covid 19, barwarira mu ngo zabo, mu gihe abasigaye bake aribo bajyanwa kwa muganga.

Facebook Forum

XS
SM
MD
LG