Leta y'u Rwanda iratangaza ko nyuma y’umunsi umwe inama y’abaministre itangaje amabwiriza mashya yo kwirinda Covid -19, kugeza ubu abantu batarabasha kuyubahiriza.
Ibi byavugiwe mu kiganiro abaministri bane harimo uw’ubuzima, uw’ubutegetsi bw’igihugu, uw’ubucuruzi ndetse na Ministre wa Siporo bagiranye n’itangazamakuru kuri uyu wa gatatu,
Ministre w’ubutegetsi bw’igihugu mu Rwanda Prof Shyaka Anastase, yavuze ko ukurikije imibare y'abafashwe barenze ku mabwiriza yo kwirinda Covid-19, byerekana neza ko abantu bagisuzugura iyi ndwara. Yavuze ko ijoro ryakeye mu gihugu hose hatahuwe utubari dusaga 80 dukora kandi bibujijwe, twarimo abantu bakababaka 300.
Ministre Shyaka yasobanuye umunsi umwe gusa nyuma yuko inama y’abaministre isohora aya mabwiriza, abantu 3000 bafashwe batambaye udupfukamunwa naho abagera ku 2500 bafashwe barenze kumabwiriza yo gutaha kare. Ministre Shyaka yavuze ko ashyigikira abatanga ibihano kubarenze kuri aya mabwiriza.
Mu byemezo biherutse gufatwa n’inama y’abaministre, ibyabangamiye abatari bake ni ibigendanye no guhagarika imihango y’ubukwe.
Ministre w’ubutegetsi bw’igihugu avuga ko ibi badateze kubihindura, gusa avuga ko bimaze gusuzumwa neza n’inzego z’umurenge zisezeranya, hari bamwe bakwiye kudohorerwa.
Minisitiri w’Ubuzima, Dr Daniel Ngamije asobanura ububi bwa Covid-19, yavuze ko abibwira ko iyi ndwara yica abageze mu zabukuru gusa bibeshya.
Yasobanuye ko udukoko tuyitera iyo tugeze mu mubiri dutuma amaraso avura ku buryo aba atagishoboye gukora umurimo wayo asanzwe akora mu mubiri, avuga ko iyi ndwara ibabaza cyane uwo yica kubera ko umubiri we uba utakibona umwuka ahumeka ngo ugere mu ngingo zose. Minisitiri Ngamije yavuze ko kugeza ubu mu Rwanda hamaze kugaragara abantu 6 800 banduye iyi ndwara barimo 739 bakiri mu mavuriro mu gihe abamaze guhitanwa n’iki cyorezo ari 57.
Facebook Forum