Ubushinjacyaha bwa Leta zunze ubumwe z'Amerika bwashyize hanze inyandiko burega Uburusiya na Qatar ko babonye uburenganzira bwo kwakira ibikombe by'isi by'umupira w'amaguru mu 2018 no mu 2022 bakoresheje ruswa.
Umushinjacyaha mukuru w'akarere k'ubucamanza ka Brooklyn, mu mujyi wa New York mu burasirazuba bwa Leta zunze ubumwe z'Amerika, arega abantu 17. Nta muny'Afrika urimo.
Mu baregwa harimo abagabo babiri, Hernan Lopez na Carlos Martinez, bahoze ari abayobozi bo hejuru b'ishami rya sports rya teveviziyo "Fox Sports" yo muri Leta zunze ubumwe z'Amerika.
Umushinjacyaha abarega ko bagize uruhare mu byaha byo guha ruswa y'amamiliyoni y'amadolari abategetsi b'ishyirahamwe ry'umupira w'amaguru muri Amerika yo hepfo, Comebol, kugirango televiziyo Fox Sports yegukane uburenganzira bwo gutangaza yonyine imikino y'amakipe yo muri iri shyirahamwe.
Fox News ni igice kimwe cy'itangazamakuru cyitwa Fox Corporation, gifite n'irindi shami ryitwa Fox News. Abanyamerika bavuga ko Perezida Donald Trump akunda cyane gukurikira televiziyo Fox News no kuyivugiraho, kandi ko ibyo ivuze we akunze kubifata nk'inama akurikiza mu byemezo afata.
Mu baregwa harimo kandi by'umwihariko abagabo babiri bahoze mu nzego z'ubutegetsi bwa FIFA, ishyirahamwe ry'isi yose ry'umupira w'amahuru, ko bakiriye indonke itubutse mu 2010 kugirango bahe amajwi yabo Uburusiya bwashaka kwakira igikombe cy'isi cyo mu 2018.
Uwa mbere ni Jack Warner wo mu gihugu cya Trinidad et Tobago. Amerika imurega ruswa y'amadolari miliyoni eshanu. Undi ni Rafael Salguero wo mu gihugu cya Guatemala. We yaba yarahawe ruswa y'amadolari miliyoni imwe.
Ku birebana na Qatar, mu bo Leta zunze ubumwe z'Amerika irega kwakira indonke zayo harimo Ricardo Teixeira, ushakishwa kandi n'Ubufaransa muri iyi dosiye. We parike y'Amerika ntisobanura uko ruswa yakiriye ingana.
Ubushinjacyaha bw'Amerika bwatangaje bwa mbere na mbere mu 2015 anketi zabwo ku kiswe Fifagate. Muri iyo anketi, abantu 45 bo mu butegetsi bw'amashyirahamwe y'umupira w'amaguru barakurikiranwe. Bamwe muri bo baraburanye bahamwa cyangwa bemera ibyaha. Ariko ni ubwa mbere na mbere na none ubushinjacyaha bwa Leta zunze ubumwe z'Amerika bureze Uburusiya na Qatar.
Uburusiya na Qatar bahakana ibirego by'ubushinjacyaha bwa Leta zunze ubumwe z'Amerika. Naho FIFA, mu itangazo yasohoye, ivuga ko "ishyigikiye anketi zose zigamije gutamaza amabi yakozwe kandi ko izahora ifatanya n'ubucamanza."
Ku Burusiya, ibi birego birabutobera cyane nyuma y'ibirego by'uko bwagize itegeko n'umuco gukoresha imiti itemewe muri sport ku bakinnyi babwo mu nzego zose za sport (ibyo bita dopage mu Gifaransa). Byabuviriyemo guhagarikwa mu mikino ya olempiki mu 2018.
Uburusiya kandi na Qatar birimo birakorwaho anketi no mu Busuwisi ku buryo byemerewe kwakira ibikombe by'isi byo mu 2018 mu Burusiya no mu 2022 muri Qatar.
Facebook Forum