Abakekwaho kwica umunyamakuru Rugambage bamanuwe muri ereza. Urukiko rwisumbuye rwa Nyarugenge mu mujyi wa Kigali, rwategetse ko abagabo babiri Nduguyangu Didace na Karemera Antoine, bakekwaho guhitana umunyamakuru Rugambage J. Leonard ko bakurikiranwa bafunzwe by’agateganyo mu gihe cy’iminsi 30, rwategetse ko bamanurwa muri gereza nkuru ya Kigali.
Urukiko rwavuze ko ibimenyetso bikomeye bituma bakekwaho ko aribo bamuhitanye, ubushinjacya bwagaragaje ko bifite ishingiro. Urukiko runasanga baramutse barekuwe, basibanganya ibimenyetso, bakaba banatoroka ubutabera.
Umwe muri abo bagabo bombi, ariwe Nduguyangu, waranabyiyemereye. Abo bagabo bombi uko ari babiri, batangaje ko batishimiye na gato icyemezo cy’urukiko, bahita bacyijuririra.
Umunyamakuru Rugambage J. Leonard, yari umwanditsi mukuru w’ikinyamakuru kigenga Umuvugizi. Yishwe arashwe amasasu atatu mu mutwe imbere y’iwe, mu ijoro ryo ku ya 24 z’ukwezi kwa 6 mu mwaka wa 2010.