Ubushinjacyaha bwasabiye gufungwa Burundu, abakekwaho kwica umunyamakuru Rugambage. Urukiko rukuru rwaburanishije mu mizi urubanza rw’abantu babiri bakekwaho kwica umwanditsi mukuru w’ikinyamakuru Umuvugizi, Rugambage Jean Leonard. Mu isozwa ry’urwo rubanza, ubushinjacyaha bwasabye ko bombi bafungwa ubuzima bwabo bwose. Urukiko rukuru ruzasoma urwo rubanza ku ya 29 z’ukwezi kwa 10 mu mwaka wa 2010.
Mu mizi y’urwo rubanza, Nduguyangu Didas, wiyemerera ko ariwe warashe Rugambage, yaranzwe no kwivuguruza mu mvugo yari yatangaje mbere k’ubugenzacyaha no k’ubushinjacyaha. Nduguyangu yahinduye imvugo ye avuga ko yarashe umunyamakuru Rugambage nta we umutumye. Ko yabikoze yihorera abantu be babiri yishe mu gihe cya jenoside. Mbere mu mvugo ye, Nduguyangu yari yavuze ko yamwishe atumwe na Karemera Antoine, wanamuhaye amafaranga ibihumbi 500, mu rwego rwo kumuhorera abantu be Rugambage yishe muri jenoside.
Mu mizi y’urubanza kandi, Nduguyangu yavuze ko yishe Rugambage, hashize iminsi itatu bahuriye kuri Sky Hotel mu Mujyi wa Kigali. Nduguyangu yavuze icyo gihe ko bavuganye ibintu bitandukanye. Muri byo ngo yababajwe n’uko Rugambage yamwigambyeho ko bashatse kumufungisha bikabananira.
Karemera we yongeye guhakana ko ntaho ahuriye n’ugupfa kwa Rugambage. Anashimira cyane Nduguyangu ko noneho ashyize ukuri ahagaragara.
Urukiko rwabajije Nduguyangu impamvu imvugo ye mu mizi y’urubanza itandukanye n’iya mbere. Avuga ko mbere yari agihuzagurika ko ariko ubu yamazegutuza, nta mpamvu yo gukomeza kubeshyera Karemera
Urukiko rukuru rwaburanishije urwo rubanza ku ya 15 y’ukwezi kwa 10 mu mwaka wa 2010. Umunyamakuru Rugambage yiciwe mu marembo y’iwe ku ya 24 y’ukwezi kwa 6 mu mwaka wa 2010.