Perezida wa Kosovo, Hashim Thaci, yeguye ku milimo ye kugirango ajye i La Haye mu Buholandi guhangana n'ibirego by'ibyaha by'intambara n'ibyaha byibasiye inyokomuntu mu rukiko mpuzamahanga mpanabyaha rudasanzwe rwashyiriweho Kosovo.
Mu kiganiro yagiranye n'abanyamakuru i Pristina, umurwa mukuru wa Kosovo, Perezida Hashim yavuze ko yeguye kubera ko atifuza kwitaba urukiko ari umukuru w'igihugu. Ati: "Byakwangiza ubusugire bw'umwanya wa perezida, ubwa Kosovo, n'ubw'abaturage bayo."
Umucamanza amaze kwemeza burundu ibirego bimuriho, perezida Thaçi yasobanuye ko atari ibihe bimworoheye, we n'umuryango we, n'abayoboke be. Mu kwezi kwa gatandatu gushize ni bwo umushinjacyaha mukuru w'urukiko mpuzamahanga rwashyiriweho Kosovo yashyikirije abacamanza barwo ikirego kuri Perezida Hashim Thaci.
Amukurikiranyeho ibyaha by'intambara n'ibyaha byibasiye inyokomuntu byo mu ntambara yo muri Kosovo yo mu myaka y'1998-99 na nyuma yaho. Birimo ubuhotozi, gushimuta abantu bakazimira, iyicarubozo, no gutoteza inzirakarengane z'abasivili.
Hashim Thaçi avuga ko ari umwere. Umushinjacyaha mukuru amuregana n'abandi bantu icyenda, barimo Kadri Veseli wahoze ari perezida w'inteko ishinga amategeko ya Kosovo. Veseli yatangaje ko yiteguye kwigemura ubwe i La Haye uyu munsi.
Mu gihe cy'intambara, yari akuriye iperereza ry'umutwe w'inyeshyamba zarwaniraga ubwigenge bwa Kosovo, Armée de Libération du Kosovo, cyangwa UCK mu magambo ahinnye yo mu rulimi rwabo rw'Icyalbannia. Mu baregwa kandi harimo uwahoze ari umuvugizi wa UCK, Jakup Krasniqi, waraye atawe muri yombi, ahita ajyanwa gufungirwa i La Haye.
Hashim Thaçi afite imyaka 52 y'amavuko. Ni we wari umuyobozi mukuru umutwe w'inyeshyamba zarwaniraga ubwigenge bwa Kosovo .
Icyo gihugu kimaze kubona ubwigenge, yabaye umutegetsi mu myanya itandukanye, irimo minisitiri w'ububanyi n'amahanga, na minisitiri w'intebe. Yatorewe kuba perezida wa Kosovo mu 2016.
Facebook Forum