Guverinoma y'Ubufaransa yabinyujije mu itangazo ivuga ko Macron yari atangiye kugaragaza ibimenyetso bya mbere, maze abaganga bamupimye basanga koko yarafashwe. Itangazo risobanura ko azaba mu kato iminsi irindwi, ariko ko azakomeza gukora akazi ke ari iwe mu rugo.
Perezida Macron abaye umwe mu bategetsi bo ku isi barwaye Covid-19 barayikira. Barimo perezida wa Leta zunze ubumwe z'Amerika Donald Trump, perezida wa Bresil Jair Bolsonaro, perezida w'Algeria Abelmadjid Tebboune, na minisitiri w'intebe w'Ubwongereza Boris Johnson. Hari abandi yahitanye, nka minisitiri w'intebe w'ubwami bwa eSwatini Ambroise Dlamini, na perezida w'inteko ishinga amategeko ya Burkina Faso, Marie-Rose Compaoré.
Hagati aho, OMS (ishami ry'Umuryango w'Abibumbye ryita ku buzima) iratangaza ko izohereza itsinda ry'abahanga bayo icumi mu Bushinwa mu cyumweru cya mbere cy'ukwezi gutaha gukora anketi ku mavu n'amavuko ya virusi ya Corona. Bagomba kureba uko yadutse, aho yadukiye, n'uburyo yakwirakwiye. Abashakashatsi bavuga ko virusi ya Corona yadutse bwa mbere na mbere mu mujyi wa Wuhan, hagati no hagati mu Bushinwa, mu kwezi kwa 12 k'umwaka w'2019.
Kuva icyo gihe, imaze guhitana abantu barenga miliyoni imwe n'ibihumbi 600 ku isi yose. Leta zunze ubumwe z'Amerika ni yo iri ku imbere y'ibindi bihugu byose. Imaze kurenga umurongo w'abantu ibihumbi bitatu ihitana buri munsi. Ejo, hapfuye 3,784. Muri rusange, Covid-19 imaze kwica abantu barenga ibihumbi 300 muri Leta zunze ubumwe z'Amerika.
FDA, ikigo cy'igihugu cy'Amerika gishinzwe ubuziranenge bw'ibiribwa n'imiti, iratangaza ko iri hafi guha uruhushya urundi rukingo rwa kabiri rwitwa Moderna, izina rya sosiyete irukora. Kuwa mbere, abaturage batangiye guhabwa urukingo rwa mbere rw'ikigo gikora imiti Pfizer.
Maison Blanche, perezidanse ya Leta zunze ubumwe z'Amerika, iratangaza ko Visi-Perezida Mike Pence azikingiza ejo kuwa gatanu. Naho ikipe ya Joe Biden, watorewe kuzaba umukuru w'igihugu, yavuze ko azikingiza mu cyumweru gitaha.
Facebook Forum