Uko wahagera

Perezida Trump Azubahiriza Icyemezo cy'Abashinzwe Amatora


Perezida Donald Trump avugana n'abanyamakuru ku munsi w'ejo

Perezida wa Leta zunze ubumwe z'Amerika, Donald Trump, aratangaza ko azava ku butegetsi niba Joe Biden, watorewe kuzamusimbura, yemejwe na Koleji y'Abatora.

Perezida Trump yabitangaje ejo kuwa kane mu kiganiro n'abanyamakuru. Ariko yongeyeho ko bizamugora cyane kwemera ko yatsinzwe. Kuri we, nk'uko n'ejo yongeye kubisubiramo, "aya matora yabayemo ubujura bukabije n'amahinyu menshi." Ariko na none nta kimenyetso cyangwa gihamya yatanze.

Joe Biden, wo mu ishyaka ry'Abademokarate, yarushije Trump, wo mu ishyaka ry'Abarepubulikani, miliyoni esheshatu mu majwi ya rubanda. Naho muri Koleji y'Abatora, Biden afite amajwi 306 kuri 232 ya Trump. Biden yarengeje umubare w'amajwi 270 yagennwe n'itegeko nshinga kugirango atorerwe kuzayobora igihugu.

Koleji y'Abatora igomba guterana ku italiki ya 14 y'ukwezi kwa 12 gutaha kugirango yemeze intsinzi ya Biden, ugomba kwimikwa mu milimo ye ku italiki ya 20 y'ukwa mbere gutaha, saa sita y'amanywa, nabyo nk'uko biteganyijwe mu itegeko nshinga.

Abanyamakuru babajije Perezida Trump niba azajya mu mihango yo kurahiza Biden, ariko yanze kugira icyo abivugaho. Gusa rero, abasesenguzi bemeza ko kwivugira ubwe ko ashobora gutanga ubutegetsi ari intambwe ikomeye yerekana ko ashobora kuba yemera ko yatsinzwe amatora, n'ubwo bwose aterura.

Kugeza ubu, ibirego byose, bigeze kuri 36, yatanze mu nkiko avuga ko Abademokarate bamwibye mu matora, n'ibindi bikorwa bya politiki yakoze kugirango yambure intsinzi Biden, byabaye imfabusa.

Naho Joe Biden yize ko Koleji y'Abatora izamwemeza n'amajwi ahabwa 306 n'ibinyamakuru, kuko muri buri leta yatsinzemo amatora, abagize iyi Koleji bose bazaba ari abo mu ishyaka rye bonyine gusa, nk'uko amategeko abiteganya.

Facebook Forum

XS
SM
MD
LG