Perezida wa Uganda Yoweri Museveni na madamu we Janet Museveni kuri uyu wa gatandatu bahawe urukingo rwa COVID 19. Mu ntangiriro z'uku kwezi nibwo ibikorwa byo gukingira abaturage ba Uganda byatangiye ariko Perezida Museveni ntabwo yahise yikingiza. Yavugaga ko atari yagahisemo urukingo azakoresha. Kuri uyu wa gatandatu yahawe urukingo rwakozwe n'ikigo AstraZeneca. Yari yambaye Imyenda y’igisirikare, ari kumwe n’umufasha we Janet Museveni bari ku ngoro ya perezida iri i Nakasero mu mujyi wa Kampala, umurwa mukuru wa Uganda.
Ministeri y'ubuzima muri Uganda yatangiye gukingira abaturage mu ntango z'uku kwezi nyuma y'aho yaboneye inkigo zikaba miliyoni zatanzwe n’ishami ry'Umuryango w'Abibumbye ryita ku buzima (OMS) na leta y'Ubuhinde.
Nyamara bitandukanye no mu bindi bihugu aho abakuru babyo bagiye gufata izo nkongo bwa mbere kugira ngo babere urugero abaturage kubera ko hari amakuru menshi yagiye ahererekanywa ku mbuga mpuzambaga anenga izo nkingo bigatuma bamwe batazigirira icyizere, Perezida Museveni we ntabwo yabimburiye abaturage be.
Ameze gufata urwo rukingo, perezida Museveni yasabye abaturage bose kwitabira ibikorwa byo kwikingiza icyorezo cya COVID 19.
Mu cyumweru gishize umuhungu wa perezida Museveni Jenerali Muhozi Kainerugaba yarikingije abimburira abasirikare bashinzwe kurinda umukuru w’igihugu gufata urwo rukingo.
Mu kiganiro yagiranye n'abanyamakuru, ministiri w'ubuzima muri Uganda Dr. Jane Acheng yavuze ko leta iri hafi kwakira izindi nkingo kugira ngo batangire no gukingira abaturage muri rusange dore ko izi nkingo za mbere zari zigenewe abakozi b’inzego z'ubuzima n'abandi bo mu nzego zihariye nk'abasirikare, abalimu n'abanyamakuru n'abandi.
Ministri yongeyeho ko bemereye n’ibigo byigenga bishaka gukingira abakozi babyo kuzana inkingo mu gihugu, avuga ko Ubushinwa bwahaye igihugu inkingo zigera ku 300,000 ariko ko bategereje ishami ry'Umuryango w'Abibumbye ryita ku buzima kubanza kuzisuzuma mbere y'uko bazakira.
Hagati aho, umukuru w'ikigo gishinzwe kurwanya indwara za virusi mu gihugu Pontiano Karebu, yatangaje ko mu gihugu hamaze kubonekamo COVID 19 y’ubundi bwoko busa n'ubwabonetse muri Africa yepfo. Ntibiramenyekana niba uru rukingo rurinda abarufashe ubwoko bwose bwa virusi ya Corona.
Facebook Forum