Pakistani yatangiye igeragezwa rya nyuma ry’urukingo rwa COVID-19 uyu munsi kuwa kabiri. Ni urwa mbere rw’ubwo bwoko rugeragejwe mu gihugu cyo muri Asiya y’amajyepfo.
Abategetsi mu kigo cy’igihugu gishinzwe ubuzima (NIH) bavuze ko Ubushinwa bwatanze uwo muti wa COVID-19, wakozwe n’isosiyeti yo mu Bushinwa “CanSinoBio” ifatanyije n’ikigo “Biotechnology” cy’i Beijing.
Urukingo rwahawe Pakistani mu buryo bw’amasezerano yo kurugerageza. Umuyobozi w’ikigo cya Pakistani gishinzwe ubuzima, General Major Dr. Aamer Ikram, yavugiye kuri televisiyo y’igihugu mu kiganiro n’abanyamakuru ko abantu ibihumbi baziyandikisha ku bushake; bakazaruhabwa mu byiciro bitatu. Avuga ko ruzatangirwa mu bitaro bikuru mu mpande zose za Pakistani. Ikram yagize ati: “Twiteze ibisubizo bya mbere mu mezi ane kugeza kuri atandatu, ubwo abantu 8 000 kugeza ku 10 000 bazaba bamaze guhabwa urwo rukingo”.
Yabaye nk’umvikanishije ko adashidikanya ko urwo rukingo rwa COVID-19 “rukora kandi nta ngaruka”, avuga ko rwamaze kwemeza mu Bushinwa kugira ngo rukoreshwe ku basilikari n’abapolisi kandi ko batangiye kuruhabwa.
Ikram yavuze ko urwo rukingo rushobora kuzaba rugeze kw’isoko “igihe bizaba bimaze kwemezwa ko rukora”, mu mezi ane cyangwa atanu.
Urwo rukingo ubu rurimo kugeragezwa ku bantu, mu bihugu bitandukanye birimo: Ubushinwa, Uburusiya, Chile na Argentine.
Pakistani yabaruwemo abantu barenga 306 000 banduye virusi ya corona, barimo abarenga 6 400 yahitanye kuva icyo cyorezo cyadutse mu gihugu gituwe na miliyoni zigera muri 220.
Cyakora ubwandu bwaragabanutse guhera hagati mu kwezi kwa kane, ubwo ku munsi handuraga abarenga abantu 6000. Abategetsi uyu munsi kuwa kabiri bavuze ko abantu batarenga 600 aribo bashya banduye virusi ya corona kandi ko bane gusa aribo bahitanywe na COVID-19 mu masaha 24 ashize.
Abategetsi b’Ubushinwa na Pakistani bavuze ko ubufatanye mu kurwanya icyo cyorezo, bwafashije gushimangira umubano ibihugu byombi bisanganywe kuva ku basekuruza.
Facebook Forum