Uko wahagera

ONU: Umubare w'Impunzi Wikubye Kabiri Kuruta mu Myaka 10 Ishize


Zimwe mu mpunzi zo mu Bugiriki

Umuryango w'Abibumbye uratangaza ko icyorezo cya Covid-19 kitahagaritse abantu guhunga ibyabo kubera impamvu zitandukanye. Umubare w'impunzi wikubye kabiri kuruta mu myaka icumi ishize.

Mu mwaka ushize w'2020, abantu miliyoni 82,4 bari bamaze kuba impunzi mu mahanga n'imbere mu bihugu byabo kubera intambara, gutotezwa, ibikorwa byo guhonyora uburenganzira bwa muntu, n'imihindukire y'ibihe. HCR itangaza ko byari bibaye umwaka wa cyenda wikurikiranyije umubare w'impunzi uhora wiyongera.

Kuri Filippo Grandi, umuyobozi mukuru wa HCR, "biratangaje ukuntu ubuzima bwose n'ubukungu byahagaze ku isi yose, nyamara impamvu zitera abantu guhunga zo zigakomeza: intambara, urugomo, ivangura, n'itoteza."

By'umwihariko muri Afurika, atanga ingero z'intambara zo muri Tigreya, Mozambique, no mu karere ka Sahel. Ni zo zateye impunzi nyinshi mu 2020. Izindi ngero ni Siriya, Yemeni, Afuganistani, Palestina, na Venezuela.

Mu bihugu bicumbikiye impunzi nyinshi, icya mbere ni Turkiya yakiriye miliyoni 3,7 baturuka cyane cyane muri Siriya. Icya kabiri ni Colombia icumbikiye ahanini abahuga Venezuela. Pakistani, yakira abahunga Afuganistani, iza ku mwanya wa gatatu.

HCR ivuga ko muri iki gihe, umuntu umwe ku ijana by'abatuye isi yose yataye ibye byose arahunga kugirango akize amagara ye. 42% muri bo ni abana batarageza ku myaka 18 y'amavuko. Naho hagati y'umwaka w'2018 n'uw'2020, impinja zigera kuri miliyoni imwe zavukiye mu buhungiro.

Mu kiganiro cyihariye yagiranye n'ikigo ntaramakuru AP cyo muri Leta zunze ubumwe z'Amerika, umuyobozi mukuru w'urwego rwa ONU rushinzwe ubutabazi, "isi ihora ikirana n'ibimenyetso by'indwara. Kugirango ibibazo by'ubuhunzi bishire, isi, by'umwihariko ibihugu bikize, ikwiye ahubwo guhangana n'imizi yabyo, ni ukuvuga intambara n'urugomo, ubuhezanguni, imihindukire y'ibihe, ruswa, n'imitegekere mibi."

Facebook Forum

XS
SM
MD
LG