Uko wahagera

ONU Irasaba Sudani Kugarura Umutekano muri Darfur


Umunyamabanga mukuru wa ONU Antonio Guterres

Umunyamabanga mukuru w'Umuryango w'Abimbumbye (ONU), Antonio Guterres, arasaba ubutegetsi bwa Sudan kurinda abaturage bo mu ntara ya Darfur mu burengerazuba bw'icyo gihugu nyuma y'uko abantu bitwaje intwaro bahateye bakica abarenga 80.

Abo bitwaje intwaro kandi bakomerekeje abagera ku 160 mu nkambi y'impunzi ya Krinding n'ahitwa Genena mu mujyi mukuru w'intara ya Darfur mu burengerazuba bw'igihugu.

Ibyabaye byatumye guverineri w'iyo ntara Mohamed Abdallah Al Douma atangaza ibihe bidasanzwe, agaba ingabo zibarirwa mu magana muri iyo ntara mu butumwa bwo kugarura umutekano.

Itangazo ryasohowe n'umuvugizi wa Antonio Guterres, Umunyamabanga mukuru w'Umuryango w'Abibumbye, ryavugaga ko ababajwe n'ibyabaye, yihanganishije imiryango y'abapfushije kandi yifurije abakomeretse gukira vuba.

Nkuko bitangazwa n'umuyobozi w'iyo ntara, ikibazo cyatangiye ku wa gatanu w'icyumweru gishize ubwo umuntu wo mu bwoko bw'aba Masilit yicaga uwo mu bwoko bw'Abarabu amuhoye ibyo batumvikanagaho. Uwo wamwishe yarafashwe, ubushinjacyaha butangira iperereza kuri icyo kibazo.

Ariko ku wa gatandatu mu gitondo abagabo bitwaje intwaro baturutse mu bice binyuranye bya Darfur bateye muri ako gace mu bisa nko guhora nkuko umuyobozi w'iyo ntara abitangaza.

Abantu babarirwa mu bihumbi bari bacumbitse muri iyo nkambi bahunze icyo gitero cyishe abantu kigasahura n'imitungo.

Facebook Forum

XS
SM
MD
LG