Leta ya Burkina Faso n'Umuryango w'Abibumbye batangaje ko abana bagizwe abasirikari baherutse kwica imbaga y'abaturage mu majyaruguru y'igihugu.
Ku itariki ya 4 y'uku kwezi, abajihadiste bateye umudugudu wa Solhan mu majyaruguru ya Burkina Faso. Ikigo ntaramakuru cy'Abongereza Reuters kivuga ko bishe abaturage barenga 130. Naho ikigo ntaramakuru cy'Abafaransa AFP kivuga ko bishe abaturage 160.
Nk'uko leta ya Burkina Faso na ONU babitangaje, abenshi cyane muri aba bajihadiste bari abana bari hagati y'imyaka 12 na 14 y'amavuko. Mu itangazo yashyize ahagaragara, Unicef (Ikigega cya ONU gishinzwe abana) yamaganiye kure gukoresha abana igisirikari. Ivuga ko binyuranye cyane n'uburenganzira bwabo bw'ibanze.
Unicef ivuga ko muri iyi myaka ibiri ishize, ibitero by'abajihadiste byahitanye abantu amagana n'amagana mu majyaruguru ya Burkina Faso. Byajugunye ku gasi abandi barenga miliyoni. Byatumye kandi amashuri arenga 2.200 afunga imiryango. Butyo abana barenga ibihumbi 300 ntibashobira kwiga.
Facebook Forum