Umuryango w'abibumbye uratangaza ko abana barenga 8,500 bakoreshejwe nk'abasilikali mu mwaka ushize w'2020. Ibi bikubiye mu cyegeranyo ngarukamwaka umunyamabanga mukuru wa ONU ageza ku nteko yayo ishinzwe umutekano ku isi.
Iki cyegeranyo kivuga ku mabi akorerwa abana mu ntambara: ubwicanyi, konona cyangwa gucagagura ibice by'umubiri bitandukanye, kubafata ku ngufu, kubashimuta, kubinjiza igisilikali, gutambamira imfashanyo kugirango zitabageraho, no gusenya amashuli, amavuriro n'ibitaro nk'intwaro z'intambara.
Icyegeranyo Antonio Guterres yagejeje ku nteko ya ONU ishinzwe umutekano ku isi kivuga ko aya mabi yose yabaye ku bana hafi 19,400 mu mwaka ushize, mu ntambara 21 zitandukanye, cyane cyane bikomeye muri Afuganistani, Siriya, Yemen, na Myanmar cyera yitwaga Birmania.
Muri aba bana bose kandi muri ziriya ntambara zose, 8,521 bakoreshejwe nk'abasilikali, 2,674 barishwe, abandi 5,748 barakomeretse. Icyegeranyo gisaba ibihugu bigize ONU kubahiriza no gushyira mu bikorwa ingamba zo kurengera umwana mu bihe by'intambara.
Facebook Forum