ONU: Abana b’Abanyafurika Bacikanwa n'Inkingo za COVID-19

Ishami rya ONU ryita ku buzima OMS, riburira ko miliyoni z’abana muri Afurika batarimo kubona inkingo zo kurengera ubuzima bwabo, zibarinda indwara zica, bitewe n’uko ibikorwa hafi ya byose birimo kwibanda ku guhashya icyorezo cya COVID-19. Imibare iherutse gutangazwa na OMS, yasanze miliyoni zirenga enye n’ibihumbi magana ane by’abarwayi ba COVID-19 bari ku mugabane w’Afurika, harimo 118,000 bapfuye.

Gahunda zikenewe z’ikingira ryo kurwanya indwara nk’iseru, imbasa na Fievre Jaune zabaye zihagaritswe mu gihe ibihugu bihanganye n’icyorezo cya COVID-19.

Nk’urugero, ishami rya ONU ryita ku buzima OMS, ritangaza ko ibihugu by’Afurika 15 mu mwaka ushize byasubitse gahunda yo gukingira indwara y’iseru kugirango byite kuri virusi ya corona. Umuyobozi wa OMS mu karere k’Afurika Matshidiso Moeti, avuga ko ibihugu birindwi muri ibyo 15, ubu ari byo byarangije ikingira ry’iyo ndwara, ariko umunani bitari byuzuza iyo gahunda bishobora kuzahura n’ibyago byo kurwaza iyo ndwara yica. OMS ivuga ko ibihugu 41 by’Afurika kugeza ubu byakiriye miliyoni zirenga 18 z’inkingo za COVID-19 binyuze mu mugambi rusange COVAX.

OMS igira iti: “Imibare ya mbere yerekana ko abana bagera muri miliyoni 16 n’ibihumbi magana atandatu muri Afurika, batahawe urukingo rwari ruteganyijwe rw’iseru hagati y’ukwezi kwa mbere 2020 n’ukwa kane 2021. Mu gihe duhananye na COVID-19, ntidushobora kugira uwo dutegeza izindi ndwara kandi zishobora kwirindwa”.

Moeti avuga ko icyizere cyiyongera ko inkingo zizatuma icyorezo cya COVID-19 kirangira. Ari nako avuga ko miliyoni nyinshi z’abana b’abanyafurika batabashije kugerwaho mu nkingo zisanzwe, bafite ibyago byo kuba bapfa. Akanavuga ko ibi bidakwiye.

Uyu mubare OMS ivuga ko urimo ibihugu birindwi byakiriye inkingo zabyo za mbere mu cyumweru gishize bitewe n’uko kuzigemura byatinze. Byaturutse ku mubare muto w’inkingo zakozwe n’Ubuhinde bwugarijwe n’inkubiri ikomeye ya COVID-19. Cyakora OMS yamenyeshejwe ko Ubuhinde buzasubukura ibikorwa byo kugeza izo nkingo kuri Afurika mu ntangiriro z’ukwezi gutaha kwa gatanu.