Uko wahagera

OMS: Ibibazo Biracyari Byinshi Mu Guhangana na Ebola Muri Kongo


Mike Ryanni we ushinzwe ubutabazi bwihuse muri OMS

Ishami ry'umuryango w'abibumbye ryita ku buzima OMS, rivuga ko urukingo rwa Ebola rurimo kugeragezwa rumaze gukiza ubuzima bw’abantu benshi, runagabanya ikwirakwira ry'indwara ya Ebola mu burasirazuba bwa Republika iharanira demokarasi ya Kongo.

Icyakora mu gihe bazirikana umwaka Ebola yongeye kuboneka muri Kongo OMS ivuga ko bagihura n'ibibazo byinshi mu guhangana n'iyo ndwara.

Tariki ya mbere y’ukwezi kwa munani umwaka ushize ni bwo hamenyekanye bwa mbere ko indwara ya Ebola yageze mu ntara za Kivu ya ruguru na Ituri mu burasirazuba bwa Repubulika iharanira demokarasi ya Kongo.

Kuva icyo gihe, ishami ry’umuryango w’abibumbye ryita ku buzima OMS, rimaze gutangaza ko abantu 1,756 bamaze gupfa bazize indwara ya Ebola, abandi 2,600 banduye iyo ndwara.

Ni ku nshuro ya kabiri icyorezo cya Ebola kibasira ibihugu byo ku mugabane w’Afurika. Mu mwaka wa 2014, iyo ndwara yahitanye abantu 11,000 mu bihugu byo mu burengerazuba bw’Afrika.

OMS ivuga ko mu duce twa Beni, umubare w’abandura ukomeje kwiyongera ku muvuduko udasanzwe ugereranyije nuko byari bimeze umwaka ushize. Amakuru OMS ivuga ko ifite, agaragaza ko mu bantu 242 bashya banduye iyo ndwara mu byumweru bitatu bishize, benshi ari abo mu gake ka Beni mu ntara ya Ituri. Ahandi hagaraga umubare munini w’abandura iyo ndwara ni mu duce twa Mandima, Mabalako na Katwa.

Mike Ryan ushinzwe ubutabazi bwihuse muri OMS, avuga ko nubwo umubare w’abandura ukomeje kwiyongera, bashimishwa n’ibimaze kugerwaho bijyanye no gukumira ikwirakwira ry’iyo ndwara.

Avuga ko ubufatanye buhari hagati y’imiryango mpuzamahanga n’ibihugu byatumye iyo ndwara itarenga intara za Kivu ya ruguru na Ituri. Avuga kandi ko iyo ndwara itararenga imipaka ngo igere mu bihugu bihana imbibi n’izo ntara.

Bwana Ryana avuga abantu 175,000 bamaze gukingirwa indwara ya Ebola nka kimwe mu buryo bwo gukumira ikwirakwira ryayo.

Yabwiye Ijwi ry’Amerika ko mu myaka amaze akurirana ibijyanye n’indwara ya Ebola ari bwo bwa mbere habayeho gukoresha uburyo bw’inkingo. Avuga ko izo nkingo zimaze gukiza ubuzima bw’abantu benshi.

Uyu muyobozi yongeyeho ko bateganya irindi gerageza ry’inkingo zikigira ebola rizatuma izo nkingo zigera ku bantu benshi. Avuga ko bizeye ko urwo rukingo ruzafasha cyane mu kurwanya no gukiza indwara ya Ebola.

Muri icyo kiganiro n’Ijwi ry’Amerika bwana Ryan yavuze ko mu bibazo bakomeje guhura nabyo mu kazi kabo muri Kongo, ikiza ku isonga ari ikibazo cy’umutekano muke.

Yagaragaje ko hari abakozi babo bamaze kwicwa n’abarwanyi. Yongeraho ko hari uduce tuvugwamo iyo ndwara badashobora kugeramo kubera ibibazo by’umutekano muke.

Uyu muyobozi yishimira kandi ko abaturage bakomeje kwemera gukingirwa no kuvurwa, ariko akagaragaza ko hakiri abanangira ngo kuko batizera izo nkingo.

Ikindi kibazo avuga bahura nacyo n’ikijyanye n’uburyo. Agaragaza ko nibura bakeneye amafranga agera kuri miliyoni 350 z’amadolari kugirango bashobore guhangana n’indwara ya Ebola.

Facebook Forum

XS
SM
MD
LG