Umuyobozi w’ishami ry’umuryango w’abibumbye ryita ku buzima OMS, yasabye inzobere zirimo gukora iperereza ku nkomoko ya Covid-19 gucukumbura amakuru avuga ko iyo virusi yavuye muri Laboratwari.
Ibi muganga Tedros Adhanom Ghebreyesus uyobora OMS yabivuze ubwo biteguraga kumurika ibyavuye mu iperereza ry’ibanze ku nkomoko ya Covid 19 ryakozwe n’inzobere mpuzamahanga.
Izo nzobere zageragezaga kumenya uko abantu banduye iyo virusi. Muganga Tedros avuga ko nubwo ibikubiye muri iyo raporo y’inzobere bidasubiza ibibazo ku nkomoko y’iyo virusi, asanga ari intambwe ya mbere nziza mu gushakisha ukuri ku nkomoko ya Covid-19.
Iryo perereza ryakozwe n’inzobere za OMS zifatanije n’iz’Ubushinwa ntizitanga umwanzuro ku nkomoko ya Covid-19 ariko zigaragaza bimwe mu bishobora kuba inkomoko yayo.
Amakuru dukesha ibiro ntaramakuru by’Abafransa byabonye ibiri muri iyo raporo avuga ko ibivugwa ko iyo virusi yaturutse muri labaratwari yo mujyi wa Wuhan mu Bushinwa bidashoboka, kuri bo basanga ishobora kuba yaravuye ku gacurama, ikanduza indi nyamanswa mbere yo kugera ku muntu.
Gusa bwana Tedros yasabye izo nzobere kutirengangiza ibivugwa ko ishobora kuba yaravuye muri laboratwari, abasaba kubikoraho ubushakashatsi bwimbitse. Uyu muyobozi wa OMS yananeze bikomeye igihugu cy’Ubushinwa kuba kitarorohereje izo mpuguke kugera ku makuru y’ibanze yari akenewe mu iperereza ryabo.
Facebook Forum